Israel Palæstina-miullu ullumi aalajangiiffiusussamik ataatsimiipput
Palæstinamiut israelimiullu siunnersuisoqatigiivi naalagaaffimmilu qaffasissumik atorfillit ippassaq sapaammi ataatsimeeqatigiipput, Israelimi ministeriunerup palæstinamiullu namminersornerulerusuttut siulittaasuata ullumi ataatsimiinnissaat piareersarniarlugu.
Nutaarsiassaqartitsiviit naapertorlugit, israelimiut palæstinamiullu akerleriissuteqarnerat qaangerniaqqullugu illuatungeriit amerikamiunit ilungersuaffigineqarput.
Nunarsuaq tamakkerlugu eqqissisoqarnissaa anguniarlugu Washingtonimi ataatsimeersuartoqartussaavoq, USA-p aaqqissugaanik, taamaammat amerikamiut aaqqiinissaannut piffissaq suli killeqarnerulerpoq.
Palæstinamiut namminersornerulerusuttut siulittaasuata, Abbasip, israelimiunik ataatsimeeqateqarneri angusaqarfiunngippata Abbas Hamasikkunnit allanillu saassutarineqarnissaminut suli navianartorsiornerulissaaq.
