Israel Libanon-imik saassussivoq
Israelip uppernarsarpaa, Libanon-ip qiterpiaanut sakkutuut saassussisimasut.
Taamatut saassussineq ataatsinngormalli isumaqatigiissutigineqartumut sakkuaakkunnaarallarnermut innarliivoq.
Peqqarniisaarnianik unitsitsiniarluni taamatut saassussisoqartoq, Israelimi sakkutuut oqarput. Ilaatigut peqqarniisaarniat Hizbollah-liartunik sakkunik Syriamiit Iranimillu assartuinissamik pilersaaruteqarsimasut Israelimiut oqarput.
Saassussineq sakkuaakkunnaarnissamik isumaqatigiissummut unioqqutitsinerulluinnartoq, Libanonip premierministeria Fouad Siniora oqarpoq.
Taamatullu pisoqarnera FN-imi generalsekretærimut Kofi Annan-imut anngunneqassaoq oqaatigineqarpoq.
Libanon-imi Hizbollah-nut sakkunik pajuttuineq unitsinneqanngippat, saassussinerit assingusut ingerlanneqartuassasut, Israelimi sakkutuut oqarput.
Toqoraanerit qanoq amerlatiginersut kisitsisinngorlugit iluamik suli paasineqanngillat.
Israelimiut sakkutuui oqarput, saassussinermi officeri ataaseq toqutaasimasoq, sakkutuullu marluk ikiligaasimasut.
