Israel Jihadillu Gazami sakkuaakkunnaarallarnissaminnut isumaqatigiissuteqartut

Israel islamisiortullu Jihadit Gazami sakkuaakkunnaarallarnissaminnut isumaqatigiissusiussangatinnarput.

Kinaassutsiminik isertuussisoq Jihadineersoq - tassa islamisiortut sakkutuutut pissusilersortuneersoq nutaarsiassaqartitsivimmut AFP-mut taama uppernarsaalluni nalunaaruteqarpoq.

Israelimiullu sakkutuui sinnerlugit oqaaseqartartoq nutaarsiassaqartitsivimmut AP-mut taama nalunaaruteqarsimasoq, dr.dk allappoq.

Inuit 31-t toqutaanerannik kinguneqartumik ulluni kingullerni saassuserujussuaqattaarnerit pereersullu sakkuaakkunnaarallarnissaminnut isumaqatigiissuteqarput.

Tamannalu nunatsinni nalunaaqutaq malillugu unnuap-qeqqata kinguninnguagut pisimavoq.

AAMMA ATUARUK Palæstinamiut sakkutuutut pissusilersortut siuttuat israelimiut sakkutuuinit toqutaasoq

Israelimiut sakkutuuisa islamisiortut sakkutuutut pissusilersortut siuttuat marlunngormat toqoreeraallu saassusinerit allartipput.

Baha Abu al-Attap toqutaanera palæstinamiut sakkutuutut pissusilersortut aalassassimaarutigisorujussuuaat. Taamanili ikinnerpaamik 350-eriarluni Gazamit rakettinik igeriussilluni saassussisoqarsimasoq Israelip ilisimatitsissutigaa.

Israelimiulli aamma saassussisimapput.

Timmisartukkut saassussinerit kingulliit Danmarkimi nalunaaqutaq malillugu sisamanngornerup unnuaani pimmata Gazami ilaqutariit palæstinamiut toqupput.

Ulluni kingullerni saassussinerni inuit 31-t toqupput, tamatumalu saniatigut inuit ikinnerpaamik 95-it ikiligaapput. Nutaarsiassaqartitsivik dpa taama allaaserisaqarpoq.

Israelip Gazallu ukiuni tallimani kingullerni sakkortusiartortumik sakkuaanneranni aatsaat taama sakkortutigisumik saassussisoqarpoq.

Sakkuaakkunnaarallarnissaminnut isumaqatigiissutaat naapertorlugu palæstinamiut sakkutuutut pissusilersortut Gazami akerliussutsimik takutitsinerit torersumik eqqissisimasumillu ingerlanneqarnissaannut qulakkeerinninnissaminnut pisussaaffeqarput.

Nutaarsiassaqartitsivik AFP paasissutissat angummit Egytenimi atorfilittamit kinaassutsiminik isertuussisumit saqqummiussat tunngavigalugit taama allaaserisaqarpoq.

Israelilu saassusseqqinnginnissaminut pisussaaffeqarpoq, taamatullu akerliussutsimik takutitsinermi isumaqatigiissutip tassa sakkuaakkunnaarallarnissaminnut isumaqatigiissutaata eqquutsinneqarnissaanik qulakkeerisussaalluni.