Israel Iranip illoqarfiisa pingaarnersaannik saassusseqqilersoq

Israelip sakkutooqarfiata Iranip illoqarfiisa pingaarnersaat, Teheran, pingasunngornermi saassuteqqippaa.

Tusagassiuutit arlallit, ilaatigut Reuters aamma AFP, naapertorlugit sakkutooqarfik taama ilisimatitsivoq.

- Israelip sakkutooqarfia Iranimi naalakkersuisunut Teheranimiittunut attaveqartunut saassussinermik annertuumik aallartitsivoq, AFP naapertorlugu Israelip illersornissaqarfia naatsumik nalunaaruteqarpoq.

Israelip timmisartuata sorsuutip F-35-p Iranip timmisartua sorsuut Teheran qulaallugu nakkartikkaa, Reuters naapertorlugu sakkutooqarfik kingusinnerusukkut nalunaarpoq.

Qaartitsinerit sakkortuut

Israelip USA-llu arfininngornermi Iran saassuppaat. Tamatuma kingorna Iran Israelimut Kangianilu Qiterlermi nunanut allanut arlalinnut Amerikamiut sakkutooqarfiinut saassussilluni akiniaavoq.

AFP-mi tusagassiortoq naapertorlugu Teheranip avannaata kangiani pingasunngornermi qaartartut tusarneqarsinnaasimapput.

AFP-p tusagassiortua naapertorlugu nalunaaqutaq 11.15 missaani illoqarfiup avannaata kangia qulaallugu pujuliortoqarsimavoq, sakkutuullu timmisartuisa nipaat tusarsaalluni.

Iranimi tusagassiuutit naalagaaffiup ataaniittut, AFP-ip nutaarsiassiinera naapertorlugu, illoqarfiit pingaarnersaanni pingasunngornermi sakkortuumik qaartoqaqattaarnera aamma nalunaarutigaat.

Iranip mumisitsinermut sakkutuui Hormuzip kangerliumarnga, umiarsuarnut ingerlaarfiusartoq nunarsuarmi uuliasiornermut pingaarutilik, tiguarsimallugu pingasunngornermi nalunaarput.

Amerikap præsidentiata Donald Trumpip umiarsuarnik uuliamik assartuutinik Hormuzip kangerliumarngani isumannaatsumik ingerlasoqarsinnaanera qulakkeerniarlugu USA piareersimasoq marlunngornermi nalunaarutigaa.

/ritzau/