Israel-imiut Palæstiinamiunut saassussimmata inuit 155-it toqutapput

Israel-imiut sakkutuuvisa timmisartunik saassussisartui Gaza-p killeqarfiata eqqaani palæstiinamiunut saassussineranni inuit 155-it toqutaapput 200–illu ikiligaallutik.
Allattoq Jaaku Lyberth
decembarip 27-at 2008 13:29

Toqutaasut amerlassusiat suli nalornissutigineqarpoq.

Gaza-mi annaassiniartartut aqutsisuat Moawiya Hassanein oqarpoq inuit 195-it toqutaasimasut.

Palæstiinamiut pikititsiniartartuisa rakitsit 80-it sinneqartut Israel-ip tungaanut igeriuppaat, tamatumalu kingorna Israel-imi pisortat aarlerisaaripput, rakitsinik igeriussinerit unitsinniarlugit saassuniarlutik.

Israel-imiut sakkutuuvisa timmisartumik saassussinerisa kingorna Palæstiinamiut sorsuttartui rakitsinik Israel-ip tungaanut igeriussipput, saassussinermilu tassani Israel-imiut sakkutuuat ataaseq toqutaavoq allallu sisamat ikiligaallutik.

Pisariaqassappat Israel-imiut saassussinertik annertusissagaat, Isral-imi aviisi Haaretz nittartakamini taamatut allaaserisaqartoq ritzau nalunaarpoq.

Israel-ip illersornissamut ministeria Ehud Barak tusagassiortunik katersortitsinermi oqarpoq, saassussinissamut piffissanngortoq.

Hamas nalunaarpoq, Israel-imiut saassussinerat akillugu, imminut toquutitigaluni qaartartumeerinninnerit Israel-imi aallarteqqinniarlugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq