Israel: Hamasit sakkutuuvut arnap assingi atorlugit qarasaasiakkut uukapaatippai
Israelip sakkutuuisa tuusintilikkaat oqarasuaataat palæstinamiut sakkutuutut pissusilersortuinit Hamasinit appakaaffigineqarput. Israelip sakkutuuisa oqaaseqartartuat taama oqarpoq.
Hamasit paasissutissanut pingaarutilinnut appakaannissaat pinngitsoortinneqarsinnaasimasoq, Israelip sakkutuuisa oqaaseqartartuat, Jonathan Conricus, oqarpoq.
- Tamannali suli naliliiffigineqaleruttorpoq, Jonathan Conricus oqarpoq.
Arnat inuusuttut kusanartut uukapaatitsissutaasimasut
Qarasaasianut avataanit appakaattartut uukapaatitsinerminni nittartakkatigut attaveqatigiittarfinni allaasuusaarsimapput. Allaasuusaarnerminni arnat inuusuttut kusanartut assingi atorlugit israelimiut sakkutuui attavigisarsimavaat.
Sakkutuut qisuariaraangata attaveqatigilertarsimavaat, sakkutuullu assinik issariarnerit 30-t qaangiukkaangata isumaminnik nungutertartunik paarlaateqatigiumaneqartarsimallutik. Sakkutuut taamaalillutik app-inik qarasaasianut ajoqutaasinnaasunik aallertitaasarsimapput.
Oqaaseqartartup Jonathan Conricusip oqarnera naapertorlugu Hamasit sakkutuut oqarasuaataat nittartakkatigut attaveqatigiittarfiit aqqutigalugit ikinnerpaamik pingasoriarlutik appakaaffiginiarsarisimavaat.
Gazami nakkutiginnittut, Hamasit, tamanna pillugu oqaaseqarusussimanngillat.