Isornartorsiuisut KNAPKp isumaqatiginngilai
KNAPK-miilli sanngiippallaarsorinngillat, Qeqertarsuullu tunuani qalerallit akii pitsaasut isumaqatigiissusiortarnermikkut qaleralinnianut iluaqutaasoraat.
- KNAPK annertoorujussuarmik suliaqarpoq. Suliat qaleralinniarnermut tunngassuteqartut annertunerpaajupput maani qullersaqarfimmi ukiuni kingullerni sulinitsinni, KNAPK-imi siulittaasoq Leif Fontaine oqarpoq.
Qaleralinnianut sullissineq annertunerarneqaraluartoq, Ilulissani, Saqqami, Qeqertami Ilimanamilu aalisartut piniartullu peqatigiiffiini ilaasortat kattuffimmit tunuarniuteqarput, KNAPK sinerissap qanittuani qaleralinniarnerup aaqqissuuteqqinneqarnerani sanngiippallaarsoralugu.
- Tassami aalisartut ilai kvotalersorlugit, ilai kvotanngitsunik tuniorarlugit, paggatassillugit, pisat ikilitillugit, affaannanngorlugit, ukiup affaannaanut pisat nunguttussianngorlugit umiatsiaararsortut eqqarsaatigalugit, umiatsiaararsortunik aalisartunik tamanik ataatsimoortumik illersuinerunngilaq, Avannaani qaleralinniat kattuffiliornissaannut akisussaasoq Anthon Lindenhann Qaleralinniarnermi aaqqissuusseqqinnequp kinguneri isornartorsiorlugit taama oqarpoq.
KNAPK-imit tunuarniutinik suli tigusaqaratik Leif Fontaine nassuiaavoq, kattuffimmillu sanngiinneraaneq ilisarisinnaanngilaa.
-Tassa tamanna eqqunngilaq. Pingaarnerusumik makku naalakkersuinikkut tunngasut suliakkiissutigineqartartut, tassa kattuffimminngaanniit angujuminaatsuusarput.
- Inatsisartut Naalakkersuisullu inatsisinik aalajangiisartuupput, KNAPKimi siulittaasoq Leif Fontaine oqarpoq.
Anthon Lindenhann isumaqarpoq KNAPK qaleralinniarnermi aaqqissuusseqqinnerup kinguneri pillugit iliuuseqanngippallaartoq.
- Aalisartut imartami ataatsimi atuisut, imminnut aalisaammiusinnaasut, ajoraluartumik inatsisitigut avissaartinneqarput, aalisartut avannaani iluarinngitorujuuaat aamma annertunerusumik kattuffik ilungersuuteqanngimmat, Anthon Lindenhann oqarpoq nassuiaallunilu Qaleralinniat Kattuffiannik pilersitsinermi aalisartut utoqqalinersiaqalernissaat sulissutigineqassasoq.
KNAPK-miilli suliniuteqarnikkut akit pitsaasut anguneqartartut, Leif Fontainep tikkuarpai.
- Qeqertaq Fishimut Halibut Greenlandimullu isumaqatigiinniartarnertigut akit pitsaasut KNAPK-minngaaniit anguneqarsimapput, Leif Fontaine oqarpoq.
KNAPK ilaasortaminut ataatsimeersuartitsinissaa maanna piareersarneqarpoq, kattuffimmik nutarterinissaq pissutsinullu naleqqussarnissaq ataatsimeersuarnermi siunertarineqarluni.
Qaleralinniat Kattuffiannik pilersitsiniat avannaani qaleraleqarfinnut paasiniaaneq ilaasortassarsiornerlu suliniutigaat, kingusinnerusukkullu kattuffimmik pilersitsinissaq siunertaralugu ataatsimeersuartitsissalluni.
