Isornartorsiuingaatsiartoqareersoq: Karl Tobiassen ullumi siunersiorneqassasoq

Aalisarnermut Naalakkersuisoqarfiup inatsit avaqqullugu marloriarluni iliuuseqarsimanera, Naalakkersuisoqarfiup pisortaata ilungersunarluinnarnerarpaa.
Karl Tobiassen (Siumut) ukiumi ataatsimi aalisarnermut piniarnermullu naalakkersuisuuvoq. Assi © : Ane-Marie Petersen/KNR
marsip 30-at 2023 12:22

Aalisarnermut piniarnermullu naalakkersuisoq, Karl Tobiassen ullumi nalunaaqutaq marlunut siunersiorneqassaaq. Tikaagulliit pillugit suliaq Karl Tobiassenimut isornartorsiuinermik kinguneqarnera pissutigalugu Inatsisartut Aalisarnermut, Piniarnermut Nunalerinermullu ataatsimiititaliaat siunersiuinissamut aggersaasuusoq.

Suliammi Aalisarnermut Piniarnermullu Naalakkersuisoqarfik inatsimmik unioqqutitsilluni marloriarluni iliuuseqarsimasoq takutippaa. Tamannalu Karl Tobiassenip siunersiuinermi ullumi marlunut akissuteqarfigissavaa.

Suliaq ataasinngormat aallartippoq. Naalakkersuisoqarfimmi tikaagullittassiissutinut qinnuteqaammut itigartitsisimanera pissutigalugu ombudsmandi, Vera Leth sakkortuumik isornartorsiuivoq.

Naalakkersuisoqarfiup Naalakkersuisut 2021-mi aalajangiinerat tassunga taarsiullugu innersuussutigaa.

Taamaaliortoqarsinnaanngilarli, taamaammat ombudsmandip suliap suliarineqarnera “ernumanartuunerarpaa”.

Aappassaanik taamaaliortoq

Aalisarnermut Piniarnermullu Naalakkersuisoqarfik aatsaat siullermeertumik kukkussuteqanngilaq. Aappassaanik kukkussuteqarpoq. Suliami assingusumi ombudsmandip aamma isornartorsiugaani 2021-mi aamma pisoqarpoq.

Taamani atorfilittat qaleralinniarnissamut akuersissutit itigartitsissutigaat.

Suliaq nassuiarneqarpoq

Novembarimi 2022-mi Aalisarnermut Piniarnermullu Naalakkersuisoqarfik ataatsimoorluni piniagassanik tikaagullittassinneqarnissamik qinnuteqaammik itigartitsivoq.

Aalisanermut Piniarnermullu Naalakkersuisoqarfiup itigartitsinerminut tunngavigisaa tassaavoq tikaagullinniarnermi piffissaliussaq patsisigineqarmat, piffissaliussarlu taanna decembarimi 2021-mi naalakkersuisunit aalajangerneqarpoq.

Ombudsmandip misissuineranut tunngatillugu naalakkersuisoqarfik ilisimatitsivoq, naalakkersuisoqarfiup itigartitsilluni aalajangernera inatsisinik atuuttunik tunngavissaqartoq.

Ombudsmandip naalakkersuisoqarfik ilaatigut isornartorsiorpaa inatsiseqartitsinikkut tunngavissanik malinninnginnerarlugu, malittarisassarmi taanna pingaaruteqartuuvoq inuttaasut piginnaatitaaffii illersorneqassappata. Naatsumik oqaatigalugu, inatsiseqartitsinikkut tunngavissamik malinnittussaaneq tassaavoq; oqartussaqarfiit aalajangigaat iliuusaallu tamarmik inatsimmik atuuttussaatitaasumik malittussaatitaanerat, allatut oqaatigalugu, oqartussat nalinginnaq piumasarsorlutik ilioqqusaanngillat, inatsimmilu allassimasut kisimik malinneqartussaatitaasut.

Ombudsmandittaaq Aalisanermut Piniarnermullu naalakkersuisoqarfik isornartorsiorpaa, 2021-mi kukkussutigeriikkami assinganik kukkoqinnerarlugu.

Copenhagen Business Schoolimi ilinniartitsisup, inatsisinillu ingerlatsinermut ilisimatusartup, Mark Ørbergip oqarnera naapertorlugu malittarisassanik unioqqutitsineruvoq. Atorfillimmi namminneq malittarisassiorsinnaanngillat.

- Malittareqqusaasuni allassimasoqanngippat, taava naalakkersuisoqarfik iliuuseqassanngilaq, taanna KNR-imut ippassaq oqarpoq.

Isornartorsiuineq ilungersunartutut tigugaa

KNR-ip aalisarnermut piniarnermullu naalakkersuisoqarfik isornartorsiuinermut qisuariaateqartinniarsarigaluarpaa.

Taakku suliamik misissuipput, piffissamili matumani oqaaseqarsinnaavallaarnatik. Ombudsmandimut akissuteqarnissaq maanna suliarineqaleruttorpoq, naalakkersuisoqarfiulli pisortaata suliap ilungersunartutut tigugitsik KNR-imut erseqqissaatigaa.

- Ombudsmandip isornartorsiuinera ilungersunartutut tiguarput, naalakkersuisoqarfiup pisortaa, Jørgen Isak Olsen KNR-imut oqarpoq.