Isornartorsiuineq tunngavissaqannginnerarpaa

Simon Olsen aalisarnermut piniarnermullu naalakkersuisutut tunuariarluni Inatsisartut aningaasaqarnermut ataatsimiititaliaani siulittaasunngornera inuinnaat naalakkersueqataanerannut naleqqutinnginnerarlugu oqaluttuarisaanermik ilinniagartuup naliliinera tunngavissaqanngitsoq, naalakkersuisut siulittaasuat Hans Enoksen isumaqarpoq.

- Inatsisartuni sulineq naalakkersuisunit akuliuffigisinnaanngilarput, Inatsisartullu ataatsimiititaliaannut inuttalersuinerit Inatsisartut namminneq suliassaraat. Taamaammat suli ulorianarnerussaaq, naalakkersuisut ilaasortanngortitseqqusillutik ataatsimiititalianut akuliuttalissagaluarpata – taamaaliorneq inuinnaat oqartussaaqataanerannut akuliunnerussaaq, Hans Enoksen tunngavilersuivoq.

Hans Enoksen aperineqarami, Simon Olsen naalakkersuisutut tunuareersimammat ataatsimiititaliami siulittaasussatut naleqqunnersoq, akivoq:

- Inuinnaat naalakkersuisooqataaneranni periarfissat taakku Inatsisartut ataatsimiititaliaata nammineq aalajangigai ataqqivakka allanngortissinnaanagillu, aamma Siumumi siulittaasuugaluarlunga. Erseqqissaavoq.

Hans Enoksen aningaasaqarnermut ataatsimiititaliami siulittaasussamik toqqaaqataasimanerluni ?

- Ataatsimiititaliami allannguiniarnermi erseqqissumik oqaatigaara, kajumittut aallaavigalugit namminneerlutik aalajangiissasut. Toqqaaneq allanngortissinnaanngilara. Hans Enoksen oqarpoq.

Oqaluttuarisaanermik ilinniagartooq Ilisimatusarfimmilu ilinniartitsisoq Daniel Thorleifsen naliliivoq, pisimasoq inuit tatiginninnerannut innarliisinnaasoq kammalaatersortoqarneranillu naliliisinnaasoqarsinnaasoq. Tamanna pillugu Siumup Naalakkersuisullu siulittaasuat ima akissuteqarpoq:

- Naluara taanna suminngaannit pinngornersoq, Naalakkersuisut siulittaasuata naalakkersuisussani nammineq toqqartarpai, tamanna ajorineqarsimassappat inatsisit allanngortinneqarsinnaapput. Tunngavilersuivoq.

Tassa imaappoq, Simon Olsenip toqqarneqarnera pissusissamisoortoq ?

- Inuinnaat tamat oqartussaaqataaneranni Inatsisartuni toqqaanerummat ataqqivara. Hans Enoksen erseqqissaavoq.