Isornartorsiuineq nunaqarfimmi pisiniarfimmit akueriumaneqanngilaq

Pilersuisup pisiniarfiata Kangerlussuarmiittup uparuartuutaa Kalaallit Nunaanni Atuisartut Siunnersuisoqatigiivisa akueriumanagu tunuartippaa, naak Kangerlussuarmi atuisartorpassuit pisiniarfik isumaginerlutaanerarlugu uparuartoreeraluaraat.
septembarip 04-at 2007 15:29

Uparuartuutit ilagaat nioqqutissanik akikillisanik pisiniarfimmi nioqquteqartoqartillugu, nioqqutissat ullussai qaangiutereernikut tuniniarneqartillugit maluginiaqqussummik allagartaliisoqarneq ajornera.

-Atuisartut Siunnersuisoqatigiivisa ilisimaaraat, pisiniarfik Namminersornerullutik Oqartussaniit akuersissummik peqartoq, nioqqutissat aalajangersimasut ullussaminnik qaangiisinnaanngortillugit niuerniarsinnaatitaasoq soorlu qaammatini pingasuni/ tallimani qaangeereersut pisiniarfimmi tuniniarneqarsinnaallutik. Nioqqutissat pineqartut tuniniarneqarsinnaapput akiisigut nalimmassanngikkaluarlugit, taamaattorli pisiniarfimmi sulisut pikkorinnermikkut akikilliliinermikkut neqeroorusiortarsinnaasimapput, KNI A/S-miit Frederik Olsen, oqarpoq.

Soorunami asiunikut naatitallu ajortunngorsimasut iginneqassapput, KNI-p ajuusaarutigaa, tamanna malitsinneqarsimanngippat, nalunngilarpullu pisiniartartuvut Kalaallit Nunaata sinneranisulli ippinnarsinnaasunik malugisaqarniartartut, tusagassiutinut nalunaarummi ilaatigut allassimavoq.

Frederik Olsenip aamma maluginiaqquaa, nioqqutissanik nunaqarfinnut isorliunerusunullu pilersorneqarnissamut atatillugu Kangerlussuarmi kiffartuussinissamik isumaqatigiissuteqartoqarsimannginnera, kisiannili iluanaarniarnissaq siunertaralugu niuernikkut nalinginnaasumik ingerlasoq.