Isornartorsiuineq Kofoeds Skolemit uggorineqarpoq
Kofoeds Skolemik atuisut qasserpiaanerat uppernarsarneqarsinnaanersoq Aalborgimi Kalaallit Illuutaani pisortamit, Jan Thrysøemit ippassaq Radioaviisikkut apeqquserneqarpoq.
Aningaasanik amerlanernik pissarsiaqarnissaq siunertaralugu atuisunik amerlanaarisimasinnaaneq mattunneqarsinnaanngitsoq Jan Thrysøep isornartorsiuinermini ilanngullugu oqaatigaa.
Aalborgimi Kofoeds Skolep immikkoortortaqarfiani pisortaq, Helle Rønn tamanna pillugu ima oqarpoq:
- Aalborgimi kalaallit ajornartorsiuteqartut atugaat soqutaanngitsutut Kalaallit Illuutaanni pisortamit isigineqarnerat ajuusaarnarpoq. Aamma amerlanaaraluta atuisunik nalunaarsuisimanerarluta oqarnera ajuusaarnarpoq, taamatuttaaq aningaasanik pissarsiaqarneruniaannarluta taamaaliortarsimanerarluta pasillernera ajuusaarnarpoq. Aamma ajuusaarnartuuvoq kalaallit maanniittut atugarisaat ilisimasaqarfiginagit oqarmat, ila taakkuulluni ajussaqaaq, tassami taakkorpiaapput ikiorniakkavut, Helle Rønn oqarpoq.
Kalaallit Kofoeds Skolemik atuisut ukiuni kingullerni amerleriarsimanerisa uppernassusaat Jan Thrysøep isornartorsiuinermini apeqquserpaa, tassa kalaallit ajornartorsiortut Kalaallit Illuutaannut isertartut amerliartunngimmata.
Jan Thrysøe taamaattumik isumaqarpoq,Kofoeds Skolemut pulaaginnartut ilanngullugit nalunaarsorneqartartut.
Kofoeds Skolep nalunaarsuinerit ajoquteqanngitsut iluamillu suliaasartut Helle Rønnip oqaatigaa:
- Atuartuutitta aqqi allattarpavut, ataasiaannarlutik isertut iseqqikkaangata inuttut normui piumasarpavut pulaartutuunngitsorlu nalunaarsortarlugit, Helle Rønn oqaluttuarpoq.
Kofoeds Skolemi atuartut 2009-mi 90-iupput ullumikkulli 145-ullutik. Taakkunannga pulaartutut allassimasut 20-ullutik.
Kofoeds Skolemi atuartut qassiuneri Aalborgip kommuneanit ilisimaneqarpoq, aamma kalaallit ajornartorsiuteqartut 225-iusut ilisimavaat.
Kisitsisit taakku uppernarsarniarlugit Aalborg kommunemiit ullumi oqaaseqartitsisinnaasimanngilagut.
Kofoeds Skole aningaasanik amerlanernik pissarsiniarluni isertunik tamanik nalunaarsuisarnerarlugu Jan Thrysøep pasillerpaa.
Taama isumaqarnera Helle Rønnip aamma akueriuminaatsippaa.
Aalborgimi Kalaallit Illuutaasa aamma Kofoeds Skolep kalaallinik sullissinerisa assigiinnginnerannik Jan Thrysøep oqarnera Helle Rønnip isumaqatigaa. Tassami kalaallit inuuniarnermikkut ajornartorsiuteqartorujussuit Kofoeds Skolemiittarmata.
- Tassalu tamannarpiaavoq assigiinngissuserput. Kofoeds Skole ajornartorsiutaasinnaasunik aaqqiiniarnermi peqataanissamut piareersimavoq aamma ajornartorsiutit kikkunnit tamanit ilisimaneqalernissaanik sulissutiginnittuulluni, Helle Rønn oqarpoq.
Aalborgimi Kalaallit Illuutaat Aalborgillu Kommunea Kofoeds Skolemit suleqatigilluarneqartartut Helle Rønnip erseqqissarpaa, isumaqaramimi Aalborgip kommunea tassaasoq kalaallinik sullissisuni pitsaanerpaamik sullissisoq.
