Isornartorsiuineq KNI-p akueriumanngilaa

KNI-p Aasianni Pilersuisumi akikitsumik pisiniarfimmik ammaaniarnera Sulisitsisut Peqatigiiffianni pisortap, Henrik Leth-ip, mamiatsaatigaa. Sermitsiami tallimanngormat saqqummersumi allaaserisamini tamanna “unammillernertut pissusissamisuunngitsutut”, aamma “inuussutissarsiortut naalakkersuisunut isumaqatigiissutigisimasaannik qussititsinerujussuusoq”, oqaatigalugu.
septembarip 02-at 2008 05:29

Pisiffiup pisiniarfii Danmarkimi suliffeqarfimmit Dagrofa-mit ingerlanneqalermata, unammilleqatigiinnermut atatillugu piumasaqaateqartoqarpoq, tassa Pilersuisoq illoqarfinni Pisiffiup pisiniarfinnik ingerlatsivigisaani pisiniarfeqarniarnani aalajangersaammat.

Radioaviisimit ippassaq oqaaseqartitsiniaraluarpugut. Kisianni pisortaanerup Søren Lennert Mortensenip aviisimi allaaserisat oqaaseqarfigerusunngilai, tamatumunngali taarsiullugu KNI-p tusagassiuutinut ippassaq ualikkut nalunaarutaa innersuussutigalugu.

Nalunaarummi tassani KNI allappoq, Aasianni pisisartut illoqarfimmi unammillertoqalernissaa qilanaarigaat. Suliffeqarfissuup aamma innersuussutigaa, uuliap nerisassallu akitsorujussuaqqammernerat, allallunilu “ullutsinni atugarilersimasavut kiinnerfiginiartussaagivut, ukiut arfineq-marluk matuma siornagut pisimasut uniffiginagit.”

Ilanngullugu oqaatigineqarpoq unammilleqqusaannginnermut isumaqatigiissut 2006-imili atorunnaartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq