Isornartorsiuineq ingasaassinertut nalilerpaa

Naalakkersuisut meeqqanik suusupaginnipput. Partiit naalakkersuisunut illuatungiliuttut naalakkersuisunut ammasumik allagaqaateqarnerminni taama allapput. Ilaqutariinnermut naalakkersuisup Arkalo Abelsenip naalakkersuisut sinnerlugit oqarpoq taamatut isornartorsiuineq ingasaassinerujussuusoq, qisuariaalli tupaallaatiginagu.
Allattoq Mads Lynge
maajip 08-at 2008 17:23

Naalakkersuisut meeqqat inuusuttullu pillugit sullissilluarput, pilersaarusiorluakkamillu iliuuseqarlutik, Arkalo Abelsen oqarpoq:

- Oqartoqaannarsinnaanngilaq uagut meeqqat atugaat suusupagigivut. Periarfissarititaasut atorlugit sapinngisannguarput naapertorlugu iliuuseqarpugut. Aamma oqaatigisinnaavara naatsorsuutigilluinnarlugu aammalu qilanaaralugu Ilaqutariit Nukittuut qitiutillugit Sisimiuni juunip aallartilaarnerani taakkua eqqartorneqassammata. Angajoqqaat sullissisorpassuillu peqataassapput, meeqqallu pisinnaatitaaffii meeqqanit namminneerluni sammineqassalluni, Arkalo Abelsen oqarpoq.

Ilaqutariit 1300-t atugarisaat pillugit aappaagu misissuisoqassasoq, Arkalo Abelsenip eqqaasitsissutigaa, Meeqqat Inuusuttullu pillugit Ilisimasaqarfiup, MIPI-p katersorsimasai paasissutissat ilassutissaqalissasut oqaatigalugu.

Kommuninngortussat nutaat peqatigilluinnarlugit sullissineq aamma pitsaanerulersinniarneqarpoq:

- Inunnik isumaginninnerup iluani, ilaqutariinnermullu tunngasut, peqqinnissamullu tunngasut pillugit kommuninngortussat oqaloqatiginissaat naalakkersuisoqarfitsinninngaannit qilanaarisorujussuuarput, Ilaqutariinnermut naalakkersuisoq Arkalo Abelsen oqarpoq.

Taanna aamma isumaqarpoq Kalaallit Nunaat Naalagaaffiit Peqatigiit Meeqqat Pisinnaatitaaffiinik isumaqatigiissummik malinnaasoq.