Isornartorsiuineq: AVALAK ersarinnerusariaqarpoq

Ilinniartut peqatigiiffiat Avalak Danmarkimi inuiaqatigiit oqallinnerannut peqataanerusariaqarppq, Danmarkimi kalaallit peqatigiiffiisa kattuffianni siulittaasoq taama isumaqarpoq. Taakkumi Kalaallit Nunaata siunissaraat, tamannalu pisussaaffiliivoq, taama oqarpoq.
Assi © : Simon Uldum
juunip 02-at 2015 07:20
Nutserisoq Simon Uldum -

Kalaallit Danmarkimi ilinniagaqartut Danmarkimi inuiaqatigiinni oqallinnermi eqeersimaarnerullutik peqataasariaqarput. Kalaallit Danmarkimi peqatigiiffiit kattuffiata Inuit siulittaasua, Bitha Metelmann, ilinniartut peqatigiiffiata Avalaap innuttaasut oqallinnerinut peqataanerunissaanik ujartuilluni taama oqarpoq.

- Nunatsinnummi sinniisuupput qaffasinnerusumillu ilinniagaqartuugamik kalaallinullu inuusuttunut allanut maligassiuisuullutik pissusissamisuussaaq oqallinnermut peqataappata, Bitha Metelmann KNR-imut taama oqarpoq.
 

Isummat pigiliutiinnakkat allanngortinniartariaqarput
Bitha Metelmannip kalaallit Danmarkimi peqatigiiffii 23-t siuttuuffigai, taassumalu erseqqissarpaa peqatigiiffiit namminneerlutik Danmarkimi inuiaqatigiit oqallinneranni peqataanermikkut sunniuteqaqataaniartariaqartut. Kalaallit Danmarkimiittut Nunatsinniittullu pillugit isummat pigiliutiinnakkat paatsuinerillu allanngortinneqassappata tamanna pisariaqarsoraa.

- Kalaaliusugut Danmarkimi najugaqartugut ikinnerussuteqartutut misigisimavugut - nammineerluta oqaluttuanik nuannersunik Danmarkimi innuttaasunut apuussisariaqarpugut.

Avalalli oqaaseqartuunissaminut immikkut pisussaaffeqartoq, Bitha Metelmann isumaqarpoq - isummat pigiliutiinnakkat allanngortinniarnissaannut aammalu Kalaallit Nunaat kalaallillu Danmarkimiittut kikkuunerinik qaammarsaassallutik, taamaaliornikkullu kalaallit Danmarkimiittut pitsaanerusunik atugaqarnissaat aqqutissiuullugu. 

Taamatulli pisussaaffeqarneq ilinniartut peqatigiiffiata ullumikkut ilungersuuttorsuunngilaa. Tamanna ilaatigut qanittukkut erserpoq, kalaallit pillugit isummat pigiliutiinnakkat pillugit Aarhusimi suliniut nutaaq pillugu oqaaseqarnissaminut qujaannarmat, Metelmann taama isumaqarpoq.

- Isumaqarpunga akuleruttariaqartut. Taakkumi (ilinniartut, aaqq.) tassaapput amerlasoorpassuarnut maligassiuisuusut. Tusarneqarunillu danskit isummanik pigiliutiinnagaannik immaqa allanngortitsinissamut iluaqutaasinnaavoq, Bitha Metelmann taama oqarpoq.
 

Nunagisaq sammerusunnerugaat
Avalaap siulittaasuata oqaatigaa ilinniartut peqatigiiffiata ileqqoreqqusaani kalaallit Danmarkimi ilinniagaqartut atugaat salliutinneqartut. Peqatigiiffiulli Danmarkimi oqallinnermi ersarippaallaannginnera siunertarineqanngikkaluarpoq.

- Soorunami ilinniagaqarnermut tunngatillugu maligassiuerusuppugut. Kalaallit ilinniagaqalernissaannut maligassiuisuulluta aqqutissiuusserusupput. Tamannali Nunatsinni ingerlatissallugu toqqarsimavarput, kalaallit pillugit isummat pigiliutiinnakkat pillugit oqallinnermut peqataanata, siulittaasoq Bjørg Lange Kristensen taama oqarpoq.

Taamaakkaluartoq peqatigiiffik Danmarkimi oqallinnermut siunissami peqataalluarsinnaavoq - assersuutigalugu kalaallit pillugit isummat pigiliutiinnakkat akiorniarneqarnissaannut tunngatillugu:

- Kalaallit peqatigiiffiisa kattuffiata Inuit siulittaasua kaammattorusuppara suleqatigiinnissamik kissaateqaruni Avalammut attaveqaqqullugu. Tamanna soorunami siulersuisut ilaasortallu akornanni eqqartussallugu soqutigaarput, Bjørg Lange Kristensen taama oqarpoq.