Isornartorsiuineq aalisartut ingerlateqqippaat
Nunatsinni aalisarneq pillugu oqallinnerni, 2011 tassaasimavoq sakkortuumik oqalliffik aammalu assortuuffiusimavoq siornatigut takuneqarsimanngisaannartumik, Naalakkersuisut siulittaasuat, Kuupik Kleist taama oqarpoq.
- Tamanit naluneqanngilluinnarpoq, ukiuni kingullerni aalisarnerup aaqqissuussaanerata aammalu aqunneqarnerata allanngortikkiartornerani, Naalakkersuinikkut oqallinneq sakkortoorujussuusimasoq aammalu assortuuffiulluni siornatigut takuneqarsimanngitsumik, Kuupik Kleist oqarpoq.
KNAPKp siulittaasuata nassuerutigaa aalisarneq pillugu oqallinneq sakkortusimavoq, taamaattoq Kuupik Kleistip isornartorsiuinera illuatungiliuttunut sammisoraa.
- Aalisarnermut inatsisip 2011-mi allanngortinniarneranut tunngatillugu, sineriak tamakkerlugu aalisartorpassuit isumaqataasimannginnerat isumaga naapertorlugu ersarissimavoq. Tassami aalisartut siunissartik aammalu aalisariutinik piginnittuunerminnut annaasaqarsinnaanertik annilaanngatigisimavaat, taamaattumik aalisartut sakkortuumik oqaaseqarsinnaaasarsimapput, Leif Fontaine taama oqarpoq.
Aalisarneq pillugu inatsit illuatungeriinnit sakkortuumik oqaliisaareersorlu Inatsartuni 2011-mi akuerineqarpoq. Sinerissami qanittuani aalisartut illoqarfinni arlalinni akerliussutsimik takutitseqattaarput, Nuummilu aalisartut siuttuufigisaannik takutitsisoqarnerani aalisarnermut naalakkersuisoq Ane Hansen oqalugiarmat, akerliussutsimik takutitsisut taanna tunuppaat, ilaatigullu tunuaqqullugu.
- Ersarissumik oqaatigineqarsinnaasoq unaavoq, tassa sakkortuumik oqaaseqartarnerni aalisartut ataasiakkaat kisimik tamaaliortarsimapput. KNAPK-milli oqaatigissavarput uangut suleqatigiinnissaq pitsaasoq pingaartikkatsigu, Leif Fontain oqarpoq.
Taassuma ilanngullugu oqaatigaa, Naalakkersuisut siulittaasuata oqaatsit kusananngitsut atorneqartut pillugit oqaatigisai, Inatsisartuni illuatungiliuttunut tunngatinneqarnerugunartut.
- Naalakkersuisut siulittaasua oqalugiaataa aallaaveqarsorinngilara aalisartut oqaatsinik kusananngitsunik kisimik aniatitsisarnerannik, isumaqarpungali Inatsisartuni illuatungiliuttut aamma pigai, KNAPK-p siulittaasua, Leif Fontaine taama oqarpoq.
