Isornartorsiorneqarneq ilumuunnginnerarpaa

Nunatsinnit nunatsinnullu nassiussanik Ålborgip umiarsualiviata attaveqaatitissatut ingerlaannarnissaanut atatillugu Royal Greenland misissuinissamut peqataajumaanngeriarluni uparuartuilerneranik taasani attaveqarnermut naalakkersuisup Jens Napaattuup (S) pakatsissutigaa.

Royal Greenlandip pisortaa Henrik Leth uparuaavoq umiarsuaatileqatigiiffiup Royal Arctic Linep Kalaallit Nunaani sullittani pingaarnerutinnagit, Ålborgi kisiat pingaarnerutikkaa.

Aningaasaqarnermut ataatsimiititaliatulli Henrik Lethip Ålborgimi sullissinermi akit qaffasippallaarnerarlugit aamma uparuaavoq. Royal Greenlandimiillu uparuaasoqarnera Jens Napaattuup pakatsissutiginngitsuunnginnerarpaa, oqarluni misissuinissamut peqataajumanngeriarlutik maanna pakatsinaqisumik uparuartuilernerarlugit.

Royal Greenlandip pisortaata Henrik Lethip peqataajumannginnermik naalakkersuisup oqarnera ilumuunnginnerarpaa.

- Ajuusaarpunga peqataajumasimannginnitsinnik naalakersuisup paasisimassappagu, tamannami ilumuunngilaq. Royal Greenlandimi oqaatigaarput Ålborgemi umiarsualiveqarfiup misissorneqarnissaanut peqataatinneqassagutta misissuinissami tunngavissaq paaseqqaarusullutigu, tamannalu Royal Arctic Linep kissaatiginngilaa, taamaammat peqataajumasimanngilagut, Henrik Leth oqarpoq.

Aamma oqarpoq suna misissorneqassanersoq ilisimatinneqarusussimanatik.

Tupigaattaaq Royal Arctic Linep nalunaarusiaata ilaannaa saqqummiunneqarmat, Henrik Lethilu isumaqarpoq umiarsualivimmik attaveqaatissamik misissuinissat attuumasuteqanngitsunit ingerlanneqartariaqartut.