Isorliunerusuni nammineerluni illuliassat amerlanerusut
Nammineerluni illuliaq nammineq pigineqartarpoq, aaqqissuussinerlu immikkut ittoq aqqutigalugu aningaasaliiffigineqartarluni. Nammineerluni illuliornermut aaqqissuussinerup siunertaraa, nammineerluni illuliassanut ernialersugaanngitsunik akilersugassaanngitsunillu taarsigassarsisitsinissaq. Nammineerlutik illuliorusuttut taarsigassarsinissamik qinnuteqaateqarnerisigut Namminersorlutik Oqartussanit taarsigassarsisitsisoqartarpoq, taarsigassarsiallu sanaartornermi atortussanut aningaasartuutit 95%-erisarpaat. Taarsigassarsisup qinnuteqaateqarnermini s anaartornermi atortussat nalingisa 5%-iinik nammineq akiliutissatut pigisaqarnini uppernarsartussaavaa.
Enoksenip ineqarnermut naalakkersuisumut Mitti Lyngemut (PI) § 37 naapertorlugu apeqquteqaammini, ukiuni 2014 - 2016-imi nammineerluni illuliassanut aningaasat qanoq amerlatigut immikkoortinniarneqarnersut paaserusuppaa.
-Nunaqarfinni illoqarfinnilu nammineerluni illuliassat assorujussuaq pitsaasumik sunniuteqarnikuupput ilaqutariippassuit illugissaalernikuupput qujanarluinnartumik. Sulili amerlaqaat illuni aserfallalluinnarsimasuni najugaqartut, ilaqutariit meeqqiortut, utoqqaallumi suli ineqartippagut ilaatigut najussallugit naleqqutinngilluinnartuni. Naalakkersuisut taakkununga pitsaanngorsaaniarlutik qanoq iliuuseqarniarnersut assut paaserusunnarpoq, Hans Enoksen (S) nassuiaavoq.