Isorliunerusuni najugallit erloqinartorsiortut

Arnaq Jansenip nukarliliaa ataatsimik kiisa ukioqalerpoq, suli tallimanik qaammateqarluni akiuussutissamik kapitinnissani suli pinagu:

- Nukarleq eqqarsaatigissagaanni akiuussutissamik kapitinnissaq amigaatigtivaa. Tallimanik qaammateqarluni pisassaraluani pinngitsoorniuuaa. Aasaq angalasoqarmat kapineqassasoq ilisimasukkaluarama, kisianni aggersarneqanngilagut, Arnaq Jansen oqarpoq.

Nakorsap tikittarnera eqqarsaatigalugu, peqqinnissaqarnikkut sullinneqarnertik akuttuallaarujussuartutut isigaa. Qaammarsaanerlu amigaralugu.

- Meeqqerisoq nakorsarlu tikikkaangamik anginerusumik paasisitsiniaassutinik imaluunniit peqqinnissaq pillugu qaammarsaanermut tunngasunik paasisitsiniaasoqarneq ajorpoq, Arnaq Jansen oqarpoq.

Meeqqat Inuusuttullu Pillugit Ilisimasaqarfiup MIPI-p meeqqat inuiaqatigiinni inissisimanerat aallaavigalugu peqqissusiannik misissuisimaneranut atatillugu inerniliussat ippassaani saqqummermata, pingaartumik meeqqat nunaqarfinni isorliunerusunilu najugallit illoqarfinni annerusuneersunit atugarliornerusut allaaseraat.

Assersuutigaat meeqqat sisamanik ukioqarnerminni atualeraangamillu nakorsamit misissortinnissaata kapitinnissaasalu pingaaruteqartut peqqinnissaqarfimmit isumagineqarneq ajornerat.

Nuussuarmi Upernavimmi nunaqarfiit avannarlerpaat tullerisaanni peqqissaavik ataasiinnarmik tiguinnakkamik sulisoqarpoq. Filippine Adamsen 1984-imiilli Nuussuup nakorsiartarfiani taartaasarluni aallartikkami 1990-imi nakkutilliisutut atorfinippoq.

- Nakorsaq ukiumut ilaanni marloriaannarluni angalasarpoq, sinneralu tamaat uagut peqqissaavimmi sulisuusutut akisussaaffisarparput. Ilaanni oqimaattarpoq, kisianni sulinera nuannarigakkut soorunami sullittarpakka, Filippine Adamsen oqarpoq.

Aamma oqarpoq, suliani nuannarigaluaqalugit ilaanni nunaqqatiminit pisuutinneqaleraangami erloqinarsinnaasartoq. Akisussaaffimmi illoqarfimmiimmat.

- Soorunami nakorsap ukiumut marloriaannarluni angalasarnera sumiginnaanermik taasinnaavarput. Angalatillugu nakorsiartitsisarpugut, nakorsiarniallit allattorsimaffimmiittut amerlagaangata tamarmik angunerineqarsinnaaneq ajorput, peqqissaavimmi sulisoq oqarpoq.

Filippine Adamsen neriuppoq siunissami nakorsanit akulikinnerusumik, soorlu ukiumut sisamariarlutik tikinneqartalissallutik.

Nuussuarmi innuttaasut Upernavimmi peqqinnissaqarfimmut sianerlutik aamma siunnersorneqarsinnaasarput.