Island avammut ammaqqinnissaminut marlunnik periarfissiisoq

Islandimiut nunanit allaniit tikeraartartunut killilersuinertik kingusinnerpaamik juunip 15-ani qasukkaaminiarlugu naatsorsuuteqarput.

Islandimi oqartussat taama nalunaaruteqarput.

Islandip avataaniit tikittut tamaasa coronaviruseqarnissaannut misissorneqarlutillu sapaatip akunnerini marlunnik aninnginnissaat oqartussanit innersuussutigineqartoq suli maanna atuutsinneqarpoq.

Tassa Islandimi najugaqaraluaraanni, Islandimulluunniit avataaniit tikikkaanni sapaatip akunnerini marlunnik aneqqusaasoqanngilaq.

- Islandi qeqertaagaluarluni, nunat tamalaat akornanni niuerfiulluarlunilu suleqatigiiffiuvoq annertuumik. Taamaakkaluartorli inuit pingasut coronavirusimik tunillatsissimasutut nalunaarsorneqarmata nunarsuarmut ammanerput killilersimaalerparput, Islandimi nunanut allanut ministeriat, Gudlaugur Thor Thordarson oqarpoq.

- Mianersornerput ingerlatiinnassavarput, neriuuteqartuaannarpugut, angallannerulli nalinginnaasunngoriartuaaqqilernissa naatsorsuutigaarput, taanna oqarpoq.

App-eq sumiissimanermik takutitsisartoq

Islandimi oqartussat naapertorlugit, nunanit allaniit tikittut sumiissimanerminnik uppernarsaammik oqarasuaamminni app-imik peqarnissaat piumasaqaataalersinnaavoq, tuniluuttoqalissagaluarpallu taanna atorlugu sumiissimaneq misissorneqarsinnaammat. Islandimi innuttaasut 40 procentiisa app-eq maanna atulereeraat, oqartussat ilisimatitsipput.

Islandimut tikinnermi piumasaqaatinut ilanngullugu coronavirusimik tunillatsissimannginnermik uppernarsaammik peqarnissaq piumasaqaataasinnaavoq. Tassanilu mittarfimmi misiliummik tigusiffigitinnissaq periarfissaasinnaassaaq, immaqaluunniit tikinnermiit sapaatip akunnerini marlunnik aninnginnissaq toqqarneqarsinnaalluni.

Imikkut ittumik akuersissuteqaraanni maajip 15-ianiilli Islandimut tikittoqarsinnaalernikuuvoq. Immikkut akuersissuteqartut tassaapput ilisimatusartut, filmimik ilitsersuisut timersortartullu.

Islandimi coronavirusip tuniluutilerneraniit maannamut innuttasunit 364.000-t missaanniittunit, inuit  54.791-it misiliummik tigusiffigineqarput.

Taakkunannga 1801-it tunillatsissimasutut nalunaarsorneqarput. Inuit qulit coronavirusimik tunillatsissimasut toqupput.