Islandip tatiginassusaa ajortutut naliliiffigineqariaannaavoq

Tamatumunnga pissutaavoq, internetikkut aningaaseriviup Icesavep Tulunnut Hollandimiunullu akiligassaannut tunngasut suli aalajangiiffigineqannginnerat. Nittartakkami Berlingske Business.dk-mi taama allaaserinnittoqarpoq.

2002-p aamma 2008-p akornanni Island nunarsuatsinni aningaasanik atortissallugu tatiginarnerpaatut Moody-mit nalilerneqartaraluarpoq.

Islandimi naalagaaffiup aningaasanik atortissallugu tatiginassusia, siorna novembarip aqqarnanni Moody-mit 1-imit 3-mut appariartinneqarpoq. 3-millu naliliiffigineqarneq tassaavoq aningaasaliiffigineqarsinnaanermut appasinnerpaaq.

Maanna Moody-mit nalunaarutigineqarpoq, Islandip atorniarsinnaanerata tatiginassusaa suli appasinnerusumut inissinneqariaannaasoq. Taamatut inissinneqarnikkut, Islandi "aningaasaliiffigineqarnissamut" piukkunnaateqanngitsutut nalilerneqariaannaavoq.

Taamaalilluni Islandip nunani tamalaani aningaasanik atorniarsinnaanera akisunerulissaaq. Tassa Isklandip naalagaaffianuinnaanngitsoq, aammattaarli Islandimiut suliffeqarfiinut, tassami suliffeqarfik sunaluunniit naalagaaffimmit angerlarsimaffigisaminit amerlanerusunik atukkerneqarsinnaasanngimmat.