ASSIT Islandip præsidentia kuultiusumik Nersornaaserneqartoq

Nuummi Arctic Circle Forumimut atatillugu nalliuttorsiualaarnermi Inatsisartut Siulittaasuata Lars-Emil Johansenip Islandip præsidentia Ólafúr Ragnar Grímsson kuultiusumik Nersornaaserpaa.
Allattoq Simon Uldum -
maajip 20-at 2016 08:27

Inatsisartut Siulittaasoqarfiata Islandip præsidentia Ólafúr Ragnar Grímsson kuultiusumik Nersornaaserpaat nunatsinnut ikinngutaalluartutut sulisimaneranut nersorinnissutitut.

Inatsisartut Siulittaasuata Lars-Emil Johansenip Islandip præsidentianut Ólafúr Ragnar Grímssonimut oqaaseqarnerminni ilaatigut erseqqissarpai:

- Inatsisartut Siulittaasoqarfiannut nunatsinnullu tamarmut ataqqinaataavoq inummik naalakkersuinikkut taama pingaaruteqartigisimasumik, tassa ukiuni 20-ini Islandip præsidentianik, tikeraartoqarnerput. Ukiuni kingullerni ajornartorsiutit Islandip nalaassimasai imaannaanngitsut qaangerniarlugit inuit imaannaanngitsut pisariaqartinneqarsimapput, Islandillu qanittukkut aningaasaqarniarnikkut ajornartoorfiani suliniarsimanerit pillugu nunat tamalaat akornanni annertuumik nersorneqartarsimavutit, takutissimavallu Island qularutissaanngitsumik qaamasumik siunissaqartoq, uagut nunatsinnit soorunami aamma malinnaavigisatsinnik.

- Ukiorpassuarni naalakkersuinermik suliaqarsimavutit, tamatumalu saniatigut ajunngisaartarnitit Nunat Avannarliit Killiit Siunnersuisoqatigiiffiata iluaqutigisimaqai, minnerunngitsumik inatsisartutigoortumik suleqatigiinnerup taassuma pingaaruteqassusianik nunarsuarmioqatitsinnut erseqqissaasarsimanitit. Nunat Avannarliit Killiit Siunnersuisoqatigiiffianni assut nuannarineqarputit, tamannalu ilaatigut ersersinneqarluni Nunat Avannarliit Killiit ukiunik 30-inngortorsiorluni nalliuttorsiornerani avaleraasartuumik kuultiusumik nersornaaserneqarnikkut, nunat avannarliit killiit, nunarput ilanngullugu, avatitsinni ilisimaneqarnerulernerannut annertuumik peqataasimaninnut qujassutitut.

- Hr. Præsident, Nersornaat kuultiusoq una sulisimaninnik inuiaqatigiit kalaallit akuersinerannut ataqqinninnerannullu ersiutaagili.