Islandip præsidentia Danmarkimut pisortatigoortumik tikeraartoq

Islandimi arnaq toqutaasoq Birna Brjánsdóttir nunatsinni sammineqaleruttortoq, islandimiut præsidentiat Guðni Thorlacius Jóhannesson Danmarkimut pisortatigoortumik tikeraarpoq.

Jóhannessonip siorna juunimi præsidentitut qinigaanerata kingorna pisortatigoortumik tikeraarnerisa siullersaraat.

Ministeriunerup Lars Løkke Rasmussenip præsidenti ippassaq naapippaa kingornalu Danmarkip Islandillu attaveqarnerat pitsaasoq nersualaarlugu.

- Inuiaqatigiit danskit islandimiut sutigut tamatigut iluaqutigilluarpaat. Attaveqarnivut pitsaasuupput, sulilu pitsaanerulernissaat sapinngisarput tamaat anguniassavarput, Lars Løkke Rasmussen taama oqarpoq.

Islandip præsidentia nulialu pillugit Dronning Margrethep aaqqissugaanik Amalienborgimi ippassaq unnukkut nereqatigiittoqarpoq.

Præsidentip ilaatigut Dansk Industimeersut ullumi naapippai, aamma Københavnip Universitetianut Naalagaaffiillu Peqatigiit Københavnimi allaffeqarfiannut ullumi pulaartussaavoq. Præsidentip tikeraarnera Nordatlantens Bryggemi aaqqissuussinermik unnugu naggaserneqassaaq.

Islandimi arnap 20-nik ukiullip toqutaanera præsidentip Danmarkimut tikeraarneranut atatillugu pisortatigoortumik eqqaaneqanngilaq.