Islandip Nunarput suleqatigiumagaa

Island siorna takornarianit en millioninit aqqusaarneqarpoq. Takornariat tamakku Kalaallit Nunaata aamma iluaqutigerusoqai. Islandimilu tamatumunnga isumaqataapput. Kalaallit Nunaat Islandilu suleqatigiillutik nunaminni takornariaqarnermik ineriartortitsisariaqarput.

Taama isumaqarpoq Inga Hlin Palsdottir, taanna Islandimi takornariaqarneq pillugu siunnersuisoqatigiinni, Promote Iceland-imi pisortaavoq.

- Isumaqarpunga Kalaallit Nunaata suleqatiginissaa assut pisariaqartoq. Arlaleriarluta taamaaliortarpugut. Minnerunngitsumik nunat ungasissumiittut soorlu Kinameersut pissarsiarinissaat. Isumaqarpunga ungasissumiinnerput atorluartariaqaripput, ikioqatigiillutalu inuit paasitillugit immitsinnut ungasinnginnatta, Inga Hlin Palsdottir oqarpoq.

Suleqatigiinnermik aanertusaarusunneq

Islandip Kalaallit Nunaat allamiorpasissoq assigiinngitsorpassuartigut suleqatigissallugu ajunngitsussaqarsoraa, maanngaanniimmi inuit pissarsiariumasagut aamma kalaallit pissarsiarerusuppaat.

- Tamakku takornarianik qaammarsagaalluarsimasunik taasarpavut. Inuit ilisimasaqartut atuartartullu. Allaniit aningaasaateqarnerupput, piareersimallutillu aningaasaatitik angalanernut atussallugit. Qarasaasiatigut inuit attaveqaataannik internernetimillu ilisimasaqarnerupput, pinngortitamiinnissartillu nuannarisarlugu, Palsdottir oqarpoq.

Aammattaaq Islandip naalakkersuisui Kalaallit Nunaannik suleqarteqarnerminnik assut annertusaarusupput. Atorfillit qullersaata Stefan Haukur Johanessonip suleqatigiissutissanik periarfissaqarsorilluarpaa, takornariaqarnerli pingaartutut taallugu.

- Islandimut takornariat amerliartorput. Ukiut qulit ingerlaneranni ukiumut 350.000-iniit siorna Islandimut takornariat millioninut qaffassimapput. Ukioq mannalu naatsorsuutigineqarpoq suli amerlanerussasut.

Takornariaqarneq aalisarneq angusimagaa

Tamanna isumaqarpoq ukiualunnguit ingerlaneranni inuussutissarsiutitigut aalisarnermiit takornariaqarneq annerulersimammat. Tamanna Kalaallit Nunaannut iluaqutaalersinnaasoq taanna isumaqarpoq.

- Islandimiit Amerika avannarlermut timmisartut ingerlaartartut amerlanerupput, Nunanit Avannarlerniit tikittartuniit. Tamanna Kalaallit Nunaannut periarfissaalluartoq, Stefan Haukur Johannesson oqarpoq.

Islandimiut takornarianut neqeroorutigisartagaat arlalinnik periarfissiisut, Inga Hlin Palsdottir isumaqarpoq.

- Isumaqarpunga Island attaveqaatitut atussallugu piukkunnaateqarluartoq. Isumaqarpunga takornariat Islandimut Kalaallit Nunaannulluunniit tikittartut misilittagassarsiorlutik angalasartut, assissaqanngitsunillu misigassarsiornerminni ingerlaqqilaarnissaminnut piareersimasarlutik, takornariaqarnermut pisortaq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat