Johanna Sigurdadottírilli normu 74-iunini naammagiinnartariaqarpaa, Tysklandimimi kansleri, Angela Merkel, nunarsuarmi arnani pissaaneqarnerpaatut Forbesip ukiut sisamassaa toqqarpaa.
Merkel Tysklandimi arnani siullersaalluni 2005-imi kanslerinngorpoq, ilimagineqarporlu naalagaaffeqatigiinnermi septembarip ulluisa 27-anni qinersisoqarnissaata tungaanut kansleriujuassasoq.
Arnat nunarsuarmi pissaaneqarnerpaat atuagassiap Forbesip ukiumoortumik toqqartarpai, USA-milu præsidentip nulia, Michelle Obama, pernaammik toqqagaasunut ukioq manna ilaavoq, normu 40-lluni.
TV-kkut oqallitsitsisartoq tusaamasaq, Oprah Winfrey, normu 41-uusoq, aamma tuluit dronningiat Elisabeth, normu 42-innaasoq, Michelle Obamap taamaalilluni qaangerpai.
Aningaasatigut sunniuteqarneq, tusagassiuutitigut soqutigineqarnerit angusaqarluartarnerillu arnat piginnaanillit toqqagaassutigisarpaat.