Islandip koruunia naleruukkiartuinnarpoq
- Islandimiut koruuniat nalikippallaaqaaq immaqalu siunissami atorunnaassaaq. Taamaattumik Islandimi Euro-mik aningaasaqalerutta pissusissamisoornerussagaluarpoq. Taama nutaarsiassaqartitsivimmi Ritzaumi issuarneqarpoq, Islandimi aningaaseriviit annersaata Kaupthingip siulittaasua Sigurdur Einarsson.
- Islandimi aningaasarsiorneq annertuujunngilaq ammasuullunilu, tamaattumillu aningaasaap nalingata nikerarpallaartarnera siunissami nammanneqarsinnaajunnanngilaq, Sigurdur Einarsson oqarpoq.
Islandip koruunia nalikippallaaqimmat Aningaaseriviup Kaupthingip nammineq aningaasaatini nunat allat aningaasaanngorlugit toqqorterpai.
Islandimissaaq aningaasaliinissamut piginneqatigiiffiup FL Groupip pisortaa Hannes Smarason isumaqataasoq oqarpoq, Islandimi naalakkersuisut iliuuseqarnissaat apeqqutaaginnalersoq.
