Islandip Danskernes Partii assuarigaa
Islandip isikkamik arsaallutik nunanut allanut unammisartuisa Europami pissartanngorniunnerni angusarissaarnerat samminikooqaarput, isikkamilli arsaattartut Islandimi kattuffiup Danmarkimi partiit ilaannik Danmarkimi inuiaqatigiissutsimik pingaartitsisumik Danskernes Partimik EM-ertoqarneranut atatillugu saassussinera oqaluttuarinikuunngilarput.
Frankrigimmi arsaattartui taartunik amillit, islandimiullu arsaattartuisa ilaat assitaliullugit, Danskernes Partip Facebookimi quppernermini kajumissaarutigaa inuit emailimi adressertik www.stemdansk.dk-mi nalunaarsoqqullugu, partiip pineqartup Folketingimut sassartitaqarsinnaanissaa anguniarsaralugu.
Taamatulli iliortoqarnera Islandimi isikkamik arsaattartut kattuffiannit KSI-mit assuarineqarpoq:
- KSI-p Danskernes Partimut atassusilerneqarnera ajuusaarutigaarput, tamannalu sukkanerpaamik unitsinneqarnissaa piumasaraarput. Danskernes Partillu pissusilersorneranut assingusunik iliortut Facebookimut erngerlutik kalerriutiginnittarnissaat kajumissaarutigaarput, Islandimi isikkamik arsaattartut kattuffiat KSI ilaatigut allappoq, immikkoortitsiniarnerillu timersornerup iluani aamma akuersaarneqarsinnaanngitsut eqqaasitsissutigalugu.
Ammit qalipaataannik timersornermi assigiinngisitsisarneq Europami oqartussanit akiorniarneqarsimaqaaq, suliarlu suli naammassinngilaq, isikkamillu arsaattartut kattuffiat matumani suleqataavoq, KSI allappoq.
Aamma atuaruk ASSIT & VIDEOt Islandi isumataarfigisinnaagipput
