Islandip aningaasaqarnikkut ajalusoornera misissuiffigineqarpoq

Islandimi aningaaseriviit siorna ajutoornerannik Islandimiut immikkut ittumik misissuisitaata, naalagaaffiup eqqartuussissuserisuata maannamut inuit 50-it missaat ilisimannittutut pasisatulluunniit apersorsimavai. Aviisimi Børsenimi taama allaaserinnittoqarpoq.
Allattoq Elisa Isaksen
septembarip 11-at 2009 11:36

Aningaasarsiornikkut ajutoornerup kinguneranik Islandimi aningaaseriviit angisuut pingasut Kaupthing, Landsbanki aamma Glitnir naalagaaffimmit ingerlanneqalerput, aningaasarsiornerlu ajalusoortillugu.

- Qasserpiaat pasineqarnersut oqaatigisinnaanngilarput, kisianni maannamut inuit 50-it killisioreerpavut, taakkua ilaat ilisimannittuupput ilaallu pasisaallutik, Islandimi naalagaaffiup eqqartuussissuserisua Olafur Hauksson oqarpoq. Taanna ukiup affaata matuma siornagut atorfinitsinneqarpoq, atorfik pisortanit qaammatini arlalinni inuttassarsiorneqareersorlu - aamma ataasinnguamilluunniit qinnuteqarfigineqanngitsoq.

- Maannamut pasinninnerit aningaasanik nalilinnillu niuernermi malittarisassanik unioqqutitsinerupput aamma inatsisinik unioqqutitsilluni aningaasanik atorniarnerullutik, taamaattorli suliassani arlalinni peqquserluttoqarsimanera qularutissaanngilaq, Olafur Hauksson oqarpoq.