Islandimut unammilerput

Volleyballimi arnani angutinilu nunanut allanut unammisartut maanna Islandilialerput Island Gameseqarnissaa sioqqullugu sungiusariarlutik. Sungiusarneq naggaserlugu pisortatigoortumik Islandimut  unamminiarput juunip 22-at Reykyavikimi ingerlanneqartussamik.

Aatsaat siullermeerutaasumik kalaallit Islandimiullu volleyballimi pisortatigoortumik imminnut unammilersut, timersoqatigiit kattuffiat nittartakkamini allappoq. Unamminerlu Daavip Goliathimut unammineranut assersuunneqarsinnaassagunarpoq Islandimiut Island Gamesimut sanilliullugu qaffasinnerusumik inissisimammata.

Volleyballertartugut taamaasillutik misilittakkanik pitsaasunik nassarlutik Island Games-riartussanngorput. Arnat puljeqatigissavaat Rhodos, Gibraltar, Guernsey kiisalu arlaleriaqalutik Island Gamesimi pissartaasartut Savalimmiormiut.

Angutit nunatsinneersut puljeqatigissavaat  Cayman Islands, Jersey, Isle of Wight kingullermillu pissartaasut Åland.

Island Games Isle of Wightimi ingerlanneqassaaq unamminerillu juunip 26-at aallartissapput. Qeqertarmiut unammiuaarneranni kalaallit timersortartuinut KNR malinnaassamaarpoq.