Islandimut takornariaqarneq arfanniarnerup ajorseriartissinnaavaa
Islandimiut arfannialernissaat isumaqatigiinngissutaaqisoq allanngortinneqarsinnaanngitsoq, naalakkersuisunngoqqammisut aalisarnermut naalakkersuisunngortitaat, saamerlerliit pinngortitamik illersuiniartortaanneersoq, Steingrimur J. Sigfusson oqarpoq.
Naalakkersuisut ungasinngitsukkut tunuartut aalisarnermut naalakkersuisuutitaat, Einar K. Gudfinnsson tunuanngitsiarluni, tikaagulliusaat tikaagulliillu arlalinnik hunnorujulikkaat pisarineqarsinnaanissaat inatsisartuni akueritippaa.
USA-p, Tuluit, Tyskit, Frankrigip, Hollandip, Sverigep Finlandillu aallartitaat, sapaatip akunnerata kingulliup ingerlanerani Islandimi aalisarnermut naalakkersuisoq ornillugu ataatsimeeqatigisarpaat. Nunat taakkua aallartitaasa sallaanniarsaralutik, taama arfanniartiginiarneq pissutigalugu Islandimi nunanit taakkunaniit takornariaqarnerup annikilleriarujussuarnissaa qunusaarutigaat.
Islandimi aalisarnermut naalakkersuisunngoqqammisoq, Steingrimmur J. Sigfusson nammineq arfanniarnermut akerliugaluarpoq, 150-inilli tikaagulliusaartassiinissamik 400-llu tikillugit tikaagullissinnaanissamik siulimi aalajangeriigaa, allanngortissinnaangilaa.
Islandimiut arfanniarnerulernialernerat aningaasaqarniarnikkut ajornartorsiornermut attuumassuteqarluinnarpoq. Arfanniarnikkummi suliffissat assigiinngitsut nutaat pilersinneqarsinnaapput, Islandillu imartaani pisuussutinik atuilluarneruinnarluni. Siorna 2008-mi, Japanimiut tikagulliusaamik 82 tonsinik, Savaliormiut tikaagullimmik 900 kilonik Islandimiit pisinerisa saniatigut, Norgemiut arferit uuliaannik 90 kilonik pisinerisigut, arfanniarneq 5 miliuuni koruuniinnarnik isertitsiffiuvoq. Maannakkulli pisarineqarsinnaasut tamarmik pisarineqassappata isertitat amerlanerujussuanngorsinnaapput.
Pinngortitamik illersuiniaqatigiiffiit takornariarnermillu suliaqartut, arfanniarnerulerniarnerup ajoqusiisinnaanera aarleqqutigaat, takornariammi akerliussutsimik takutitsiniarlutik Islandiliarusukkunnaarpata, tamanna isertittakkatigut suliffissaqarniarnikkullu malunnaateqassaqimmat.
