Islandimut nannumik ikaartoqaqqippoq
Nannumik Islandimut pisoqaqqippoq. Københavnimi uumasuusivimmi uumasut nakorsaat maanna ikiuiartorluni Islandiliarpoq.
Nanoq Kalaallit Nunaanniit nalussimagunartoq Islandip avannarpasinnerusortaanut ippassaq tulassimavoq. Naasorissaasup paniata qulinik ukiullip qimmini qiluppallaaqimmat ornillugu takulersimavaa nanorsuaq, qiviaraanilu angerlamut tamaviannguat arpassimavoq. Nanoq maanna mannittorlunilu timmiartuumasoq oqaatigineqarpoq, miteqarfimmi eqqorlugu tulassimagami. Naasorissaasup nanoq nuannarivallaanngilaa, timmissat ikilisarlugillu qiviunik katersinissaraluani aningaasarsiutigisani ajoqusersormagu. Sapaatip akunnerisa marluk matuma siornatigut nannumik aamma Islandimut pisoqarpoq, taamani pisortat aalajangerput nanoq aallaaneqassasoq.
Borgthor Kjærsted Islandimiit oqaluttuarpoq, nunanit tamanit tusagassiuutitigut qalipaatilinnik assitalersorlugu nannup aarasaartup saqqummiunneqarnera kusananngimmat, nannullu ulorianartorsiortinneqarnerat oqaatiginiarneqartarmat tusaamaanerlunneqaatigeqinagamikku nanoq maanna Islandimut pisoq toqunnaveersaaraat. Uumasut nakorsaataa nanoq qimerlooreerpagu qanoq iliuuseqarnissaq paasineqassaaq. Nanoq utoqqaavallaarpat toqunneqarnissaa siunniunneqarpoq, utoqqaavallaanngippat nukittullunilu peqqippasippat imaassinnaavoq timmisartumik Kalaallit Nunaannut oqqunneqartoq.
