Islandimut Islandimiillu timmisartuussisalernissaq suli aaqqinngilaq

Kiffartuussinermi sullissinissamut isumaqatigiissutit nutaat malillugit Kulusuup Nunattalu Kujataata akornanni kiisalu Islandimi Reykjavikimut timmisartuussisarnissaq aaqqiivigineqanngilaq.

Naalakkersuisut siulittaasuat, Hans Enoksen, Ineqarnermut Angallannermullu maanna aamma naalakkersuisuusoq, oqarpoq islandimiut akissuteqarnissaat Naalakkersuisut maanna piffissami sivisuumi maanna utaqqereeraat. Tamannalu naammagiinnarunnaarpaat.

- Angallannermut naalakkersuisuusimasup tunuaqqammersup islandimiut arlaleriarluni attaveqarfigisareerpai, uanga massakkut utaqqeqqinnianngilanga, utaqqinerput aamma killeqartariaqarmat.

Islandip Nunattalu Kujataata akornanni timmisartuussisarnissaq pillugu Islandimi ministeriuneq, Halldór Asgrimsson, Hans Enoksen-ip attaveqarfiginiarpaa.

Islandimiut timmisartuutileqatigiiffiat, Air Iceland, naapertorlugu islandimi naalakkersuisut 1,2 millioni koruuninik aningaasaliiniarput. Namminersornerullutik Oqartussat aamma taakku amerlaqataannik aningaasaliinissaat taamaallaat maanna utaqqineqarpoq.

Piffissaliussallu killinga qanillilluinnarpoq, isumaqatigiissummi maanna atuuttoq ullumimiit qaammat ataaserpiaq qaangiuppat naasussaavoq.

Air Icelandip pisortaanera, Arni Gunnarsson, Radioaviisimut oqarpoq, takornariaqarneq eqqarsaatigissagaanni manna pisoq assut aarlerinartoqartoq, aqqummi taannarpiaq pillugu aappaagumut ussassaarisoqalereermat.

- Sapaatit akunneri tamaasa aarlerinarsiartuinnarpoq, augustip aallaqqaataa aallartitsinnagu aaqqiisoqanngippat taamatut timmisartuussisarnissaq akilersinnaajunnaassaaq, Arni Gunnarsson oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat