Islandimiutut akitsuusersuissaagut?
Qanormita issagaluarpa, politikerit aalisarnermi akitsuutinik ukiumit ukiumut qaffaasaqattaarunnaarlutik appaasaqattaarunnaarlutillu akitsuusersuinermut periusissiorunik, aalisartitseqatigiiffiit aalisakkanik aningasarsissutaanerpaanik aalisartut akitsuutinik annermik akiligassinneqartarpata? Islandimiut taama aaqqeeqqammerput.
Taama aaqqissuussinikkut Islandip naalagaaffiata karsianut isaatitsinannginnerussaaq, Naalakkersuisuilli neriupput, taamaaliorneq aalisarnermik inuussutissarsiortunut iluaqutaassasoq akitsuusersueriaaserlu naapertuunnerulissasoq.
- Aalisarnermi akitsuutit maani Islandimi oqallisigigaatsiarneqaramik, Þórir Hrafnsson, Islandimi inuussutissarsiornermut aamma inuussutissarsiutinik ineriartortitsinermut ministeriaqarfimmi tusagassiisarnermik suliaqartoq, taama oqarpoq, nassuiaallunilu aalisarnermi akitsuutit Naalakkersuisut 2012-imi iliuutsimik siulliit ilaattut appartissimagaat.
- Maanna Naalakkersuisuusut isumaqarput, akitsuutit ingasattajaartuussanngitsut aalisartullu akiliisinnaaneri aallaavigalugit qaffasissusilerneqartassasut.
Islandimiut aalisartui ukiuni kingullerni atugarliorput, Naalakkersuisullu 2012-imi aalisarnermi akitsuutinik appartitsillutik assamminnik isaassinerat nuannaarutigeqaat, taamaalillutimmi isaatitaqarnerulerput.
Islandimi aalisagartat tamarmik akitsuuteqartinneqarput. Kisianni akitsuutit tamarmik appasissuupput - assersuutigalugu avaleraasartuunut akitsuut kilomut 0,30 koruuniuvoq, Nunatsinni taassuma pingasorarterutigigaa, tassa kilomut 0,95 koruuniulluni.
Akitsuutinillu iluarsartuusseqqinneq nunami sanilerisatsinni isumaqatigiinngissutaasimaqisoq Þórir Hrafnsson oqaluttuarpoq.
- Aalisartut tunisassiortullu akitsuutinik qanoq akiliitiginissaannut, Islandimi politikerit assigiinngeqisunik isumaqarput, Islandimi ministereqarfiup tusagassiinermi suliaqartua oqarpoq.
Kisianni tassa, aalisakkat amerlanerpaanngorlugit qaqinneqartartut akitsuuteqartinneqartassasut, Islandimi amerlanerussuteqartut isumaqarput. Tassalu akitsuutit qaffasissusissaat aapaaagumit allanngorartinneqalissapput, aalisagartarineqarnerpaat akitsuuteqarnerpaanngorlutik.
Nunatsinni akileraarutinut akitsuutinullu politikkikkut akisussaasuusoq, aaningaasaqarnermut naalakkersuisoq, Vittus Qujaukitsoq, KNR-imut oqarpoq, Naalakkersuisut Islandimiut akitsuusersueriaasiannik soqutiginnittut.
- Aalisarnermi akitsuutinik tamanik misissuisussanik suleqatigiissitalioqqammerpugut. Taakkua aamma Islandimiut assigiinngisitaartumik akitsuusersueriaasiat misissuataassavaat, naalakkersuisoq oqarpoq.
Akitsuutilli aqagutsiaannaq allanngorunnanngillat, suleqatigissitammi inassutaat 2015-ip aallartinnerani aatsaat saqqummiuneqassapput. Vittus Qujaukitsorli allappoq, aalisarnermi akitsuutit pillugit inatsisinik allannguutissatut siunnersuummik 2015-imi upernaakkut katersuunnissamut saqqummiussaqarnissani natsorsuutigalugu.
