Islandimiut ullumikkut taasitinneqarput
Islandimi unnugu qulinngorpat, qinersiviit matuneqassapput - tassa uagut nalunaaqutarput naapertorlugu nalunaaquttap akunnerata aappaata affaa qaangiuppat.
Aningaaseriviup Icesavep perulluliortitsinera pissutigalugu, Islandimi qinersisartut ullumi taasitinneqarput - tassami Islandimi inuiaqatigiit - taamalu Islandimi akileraartartut Hollandimut Tuluillu Nunaannut 30 milliardit koruuninik akiligassaqalersinneqarmata.
Islandimi politikerit juulli sioqqutitsiarlugu isumaqatigiissuteqarput, isumaqatigiissullu taanna ullumikkut taasissutigineqartoq, qinersisartut 75 procentiinit itigartinniarneqarpoq.
Taamaattorli juullip kingornagut Hollandimut aamma Tuluit Nunaannut isumaqatigiinniarnerit ingerlateqqinneqarput, pitsaanerusumillu isumaqatigiissuteqarnissaq ilimanaateqalerluni. Taamaattumik Islandimi ministeriunerup Johanna Sigurdardottirip ullumikkut taasisitsineq siunertaqanngitsutut taavaa, taasisitsinermullu peqataaniarnani nalunaarluni.
DR-ip ilanngutassiortuata Niels Qualep aamma oqaatigaa, qinersisartorpassuit taasiartorsimanngitsut. Qinersisartunik isumasiuinermi ualimut ingerlanneqartumi oqaatigineqarpoq, qinersisartut 26 procentiinnaat taasiartorsimasut.
Taasisitsineq naatsorsuutigineqartutut itigartitsinermik inerneqaraluarpat, tamanna piffissaq qaninnerusoq isigalugu Islandip aningaasaqarniarneranut ajornerulersitsissaaq, tassami aningaasat Islandip nunanit allanit atorniarniagai, pisariaqartinneqaqisut kinguarsarneqassammata. Matumani pineqarput Nunat siuarsagassat taarsigassarsiniartarfiannit atorniarneqartussat aamma ilaatigut nunat Skandinaviamiittut, Hollandimut Tuillu Nunaannut taarsersuinissamik isumaqatigiissuteqartoqartinnagu atukkiiumanngitsut.
Qaammatini kingullerni isumaqatigiinniarnerit ilimanarsisippaat, Islandimut pitsaanerusumik isumaqatigiissuteqartoqarsinnaasoq, ilaatigut akiitsut erniakinnerunerannik kinguneqartumik. Tamanna iluatsissappat amerlanerussuteqartut ullumi itigartitsinissaat Islandimiut politikeriinut annerusumik kinguneqarnavianngilaq.
Taasisitsinerup inernera aatsaat unnuaru paasinarsissaaq.
