Islandimiut taasisussanngorput
Islandimiut akiitsorpassuisa akilerneqarnissaannut Islandimi Altingip inatsisiliaa 2010-mi marlunngornermi januaarip tallimaani Islandip præsidentiata atsiorumanngilaa. Aningaasat ima amerlatigaat Islandimi inuttaasunut agguaqatigiisikkaanni inuk ataaseq 90.000 koruuninik akiliisussanngussaaq. Tamannarpiarlu innuttaasut taasissutigisussanngorpaat.
Islandip præsidentia BBC-mi ippassaq unnukkut apersorneqarluni oqarpoq Islandip akiitsoqarfini akilerumaarai.
Tamannali qanoq pissanersoq nalunarpoq, isumasiuinerimmi tunngavigissagaanni akiitsut akilerneqarnissaat innuttaasut naaggaarmassuk. Tassami inuttaasut affaat sinnerlugit, tassa 51%-ip 58%-illu akornaniittut, naaggaarput.
2008-mi aningaasarsiornerup nakkaattoornissaata tungaanut Islandimiut, taakkuluunniit aningaaserivimmiittortaasa, sapiiserpallaartarnerisa Island aningaasatigut ajutoortilluinnangajappaat suliffissaaleqisorpassuaqalersillugu atorniarnikkullu erniat qaffatserujussuarlugit.
Innuttaasunik taasisitsinissaq akileerusunnginnerlu tutsiummata aningaasarsiornikkut siunnersortit Islandimiut akiliisinnaassusaat sorpajuttut isigilerpaat.
Islandimiut aningaaseriviat Icesave nakkaattoormat Hollandimiut Tuluillu aningaaserivimmi uninngasuutillit uninngasuutitik tamaasa annaavaat. Taamaammat Holland Tuluit Nunaallu uninngasuutilinnut ikiorsiisariaqarput. Icesave peerutereeraluartoq suli akiitsorpassuaqarpoq.
