Islandimiut taaseqqittussanngorput

Grimsson taama nalunaaruteqarnermigut internetsikkut aningaaseriviup, Icesavep, nakkaattoornerata kingorna Hollandimut Tuluillu Nunaannut milliardit koruunerpassuit taartissat isumaqatigiissutiginiarneqarnissaat kingumut nalorninarsisippaa.

Islandimi inatsisartunut, Altingimut, ilaasortat amerlanerussuteqarluartut taasiinissamut isumaqatigiissut sisamanngormat akuersissutigigaluarpaat, Olafur Grimssonilli isumaqatigiissut tassa akueriumanngilaa, inunnillu taasisitseqqinnissaq piumasarinialerlugu.

Icesave pillugu isumaqatigiissut Islandimut pingaaruteqarpoq, Islandimmi aningaasarsiornikkut ajornartorsiorneq qaangerniarlugu nunat siuarsagassat taarsigassarsiniartarfiannut, IMF-imut, taarsigassarsiniarnissaanut pingaaruteqarluinnarmat.

Internetsikkut aningaaserivik Icesave Islandimi aningaaserivissuarmit Landsbanimit pigineqaraluarpoq, Landsbanki 2008-mi akiliisinnaajunnaarpoq.

Tuluit hollandimiullu 340.000-it missaanniittut milliardit koruunerpassuarnik annaasaqarput, nunallu taakku marluk naalakkersuisuisa atuisut annaasaqarnerat qularnaveeqquserpaat.

Naalakkersuisut qularnaveeqqusiutaat 32 milliardit koruunit missaat Hollandip Tuluillu Nunaata Islandimut kingorna taarseqqulerpaat.

Island qanoq amerlatigisunik taarsiissanersoq, sunalu piumasaqaataassanersoq, nunat taakku pingasut ukiut marluk ingerlaneranni isumaqatiginninniutigaat.

Nunat taakku pingasut ukiup ataatsip matuma siorna isumaqatigiissuteqarput. Isumaqatigiissulli taanna Olafur Grimssonip aamma akuererusunngilaa, inunnillu taasisitsilluni. 90 procentit naaggaarput, isumaqatigiinniarnerillu nutaat aallartillutik.

Taasisitseqqittoqarnissaalu maanna tassa pisussanngorunarpoq.