Islandimiut skakkertartut festivalertitseqqilersut
Islandimi skakkertartut peqatigiiffiat, Hrókurinn, Tunumi pingajussaanik skakkertitsissaaq.
- Ukiut pingajussaannik festivalertitsisinnaanerput nuannaarutigeqaarput, Hrókurinnimi siulittaasoq, Hrafn Jökulsson, taama oqarpoq.
- Skakkerluni festivalernerit siulliit marluk iluatsilluarput. Islandip Kalaallit Nunaatalu akornanni - skakkerneq aqqutigalugu - atassuteqarnerup nukittorsarnissaa, taamaaliornikkullu assigiinngitsutigut ikinngutigiilersitsinissaq anguniakkatta annersaraat, siulittaasoq oqarpoq.
Aamma atuaruk Nunatsinni skakimi pissartanngorniunneq islandimiusut aalajangiiffigineqassaaq
Polar Polagic Skakfestivalimi pingaarnertut pisussaq tassaavoq tasiilarmiu qanittukkut toqusoq Gerda Vilholm eqqaaniarlugu unammiuaartitsinissaq.
Gerda Vilholm Hrókurinip Tasiilami suliaanik tapersersuilluartuusimavoq, meeqqallu atuagaarniarfiutaa caféutaalu NERIUSAAQ skakkeriarfigisarpaat.
Taamaammat eqqaaniaalluni unammiuaartitsinissaq sapaammi februaarip 19-iani Tasiilami aallartinneqarpat immikkut ittuussaaq.
Polar Polagic Skakfestivali nunatsinni umiarsuaatileqatigiiffimmit, Polar Pelagic A/S-imit aningaasaliiffigineqarpoq, taannalu Polar Seafoodimit islandimiullu suliffeqarfiutaannit Síldarvinnslan HF-imit pigineqarpoq. Aningaasaliisut allat tassaapput Air Iceland aamma Tele-Post. Suliffeqarfiit inuinnaallu arlallit aamma pokalinik, akissarsiassanik tunissutissanillu tunissuteqartuupput.
