Islandimiut koruuniat nalikilleriarpoq
Islandimiut koruuniat 1 procentimik ullumi nalikilleriarpoq, aningaaserivimmilu Danske Bankimi aningaasarsiornermik immikkut ilisimasallip, Lars Christensenip, oqarnera naapertorlugu ulluni sapaatip-akunnerinilu tulliuttuni nalikilliartornissaa ilimanarpoq.
- Islandimi aningaasarsiornerup unikaallannissaa ilimagineqartariaqarpoq. Iliuuseqartoqajaartinnagu ajorsiartornissaa aamma ilimagineqassaaq, Lars Christensen Ritzaumut taama oqarpoq.
Islandimiut koruuniat ulluni kingullerni arfineq-marlunni nalikilliartuinnavilluni katillugu 5 procentimik nalikillivoq.
Aningaaseriviup Danske Bankip sullitani islandinimiut aningaasaataannik pisinissaat ullumi mianersoqqussutigaa.
Nunani tamalaani atukkiiniarnermi atukkerniakkap akiliisinnaassuseqarneranik misissuisartut pingasut tamatumunnga isumaqataapput.