Islandimiut ilimagisaareersutut ajugaapput
!7-inik ukiulik Steinum Gudjonsdottir Hafnarfjordur-imi FH-meersoq Faxe Cupimi isertitsinerpaagallarpoq arfineq pingasoraarami. Taamatuttaaq isertitaqarput Linda Lyberth Byhold-ineersoq, Panu P. Grønvold GSS-imeersoq aamma Karen Marie Kyed Meyer NÛK-meersoq.
Byholidt FH-llu unammineranni ilimagisaareersutut Islandimiut ajugaapput 37-26-mik. Siullerpaamik Byholdit arsaqatigiipput. Tassani arsartuupput kalaallit Danmarkimi najugallit, Sisimiuneersut, Ilulissaneersut Nuummeersullu.
GSS aamma NÛK unammimmammat GSS qularnaalluartumik ajugaavoq 32-24-mik. NÛK arlalippassuariarluni kukkusarpoq tamanna GSS-rmiut sukkasuumik saassussinerannik kinguneqartarpoq.
Unnugu unamminissat pissanganarput tassani NÛK aamma Byholdit unammissammata nalunaaqutaq 19.00 kiisalu GSS aamma FH nalunaaqutaq 20.40 unammissallutik. Pissanngatigineqarpoq nunatsinni pissartat GSS-imeersut FH Islandimi pissartanngorniunnermi upernaaq normu 7-nngortoq unammillersinnaassaneraat.
- Assersuineq tassani assorsuaq pingaaruneqartussaavoq. Arsap annaaneri tamaasa utipallattarnissarput pingaaruteqartorujussuussaaq, GSS-mi sungiusaasoq Miki A. Heilmann KNR-imut taama oqarpoq.
- Ippassaq unamminermi FH-meersut takutippaat imminnut sungiussimanertik aamma periarfissap takunnissaanut utaqqisinnaassuseqarlutik. Arsartugut sukkagaluarput kisianni Islandimiut uagutsinniit sukkanerulaarunarput, taamaammat periarfissap takkunnissaata utaqqilluarnissaa arsartutsinnut pingaaruteqarpoq pisariaqanngitsumik arsaq annaanaversaaqqissaartussaasagatsigu, Miki A. Heilmann oqarpoq.
Aajuku pingasunngornermi angusat:
NÛK - GSS 24-32 (17-8)
FH - Byholdet 37-26 (18-12)
Aajuku sisamanngornermi unamminissat:
Nal. 19.00 NÛK - Byhold
Nal. 20.40 FH - GSS