Islandimiut EU-mut qanillattornerulerput

Islandimiut EU-mut ilaasortaarusunnerat ukiap ingerlanerani annerulersimavoq.
septembarip 29-at 2010 12:55

Islandimi aviisit ilaasa, Fréttabladid-ip misissuinera naapertorlugu, islandimiut pingasuugaagata marluk, EU-mut ilaasortanngornissamut isumaqatigiinniarnerit naammassinissaat kissaatigaat.

Juunimi ukioq manna misissuinerit illuatungerluinnaanik inerneqarput.

Taamani misissuisoqarmat aperineqartut amerlanersaasa kissaatigaat ilaasortanngornissamut qinnuteqarneq unitsinneqassasoq.

EU pillugu inuiaqatigiit oqallinnerat allanngoqattaartoq, Akureyrip universitetiani professori, Grétar Thór Eythórsson oqarpoq.

- EU-mut oqaloqatigiinninnerup aallarteqqinnera sumulluunniit ajoqutaassinnaanngitsoq inuit paasisimagunarpaat, Grétar Thór Eythórsson oqarpoq.

EU-mut isumaqatigiinniarnerit qanorluunniit inerneqaraluarpata, tamanna innuttaasut taasinermikkut akuersissutigeqqaartussaavaat.