Islandimiut erloqipput

Islandimiut ulluni makkunani neriuutissaqarpallaanngillat. USA-p Keflavikkimi sakkutooqarfimminnik matusiniarlutik aalajangernerata kingorna soraarsitsiortornerit, annaassiniarnermilu timmisartuussinerit amigaataalersussat saniatigut Islandimi sakkutuuerutissaaq.

Islandimi naalakkersuisut ullumi amerikamiut nunanut allanut ministereqarfimmit kiisalu illersornissamut ministereqarfimmit aallartitanik Islandip Amerikallu akornanni illersornissamut isumaqatigiissutit ataatsimiissutigissavaat.

Islandi sakkutooqanngimmat USA-p 1951-miilli Islandimi sakkutooqarfeqaleramili illersornissaq akisussaaffigilerpaa.

Amerikamiut sakkutuuerunnerata kingorna illersornissamut isumaqatigiissut iluaqutaavallaassanngitsutut Islandimi ministeriunermit Asgrimssonimit isigineqarpoq.

- Illersornissamut isumaqatigiissutip sumut atorneqarnissaa paasisinnaarpianngilara illersuisueruttussaagatta, Asgrimssson nutaarsiassaqartitsivimmut NFS-imut oqarpoq.

Amerikamiut sakkutuui septembarimi Islandimit angerlareersimassapput.