Islandimiut Danmarkimi najugaqartut ilaat aningaasaqarniarnermikkut ajornartorsiuteqarput

Islandimiut aningaasarsiornikkut ingerlatsinerat ajutoornissamut qanilliartuinnarpoq. Islandimi aningaaseriviit marluk aqunneqarnerat naalagaaffimmit ingerlanneqalerput, siullermik aningaaserivik Glitnir naalagaaffiup ingerlatilerpaa, ullumikkullu Landsbanki aamma naalagaaffimmit ingerlanneqalerpoq. Islandimiut koruuniat 33 procentimik nalikilleriareerpoq, tamannalu Islandimiunut Danmarkimi najugaqartunut eqquisorujussuuvoq.
Allattoq Mads Lynge
oktobarip 07-at 2008 18:18

Taakku ilagaat Gudrun Gisladottir, siusinaarluni soraarnerussutisiaqartoq.

Siornatigut qaammammut 12.000 koruunit inuussutigisinnaasaraluarpai. Maannali siusinaarluni soraarnerussutisiallip Gudrun Gisladottirip Islandimiuusup 7.000 koruunit inigisaminut akiliutissatut, aningaasartuutinut aalajangersimasunut, inuussutissanut bussinullu atugassani naammagisariaqarpai.

Gudrun Gisladottir Danmarkimi najugaqarpoq, siornatigullu oqalutsitut atorfeqarsimagaluarluni. Qiterlorujussuarnermili kinguneranik qitini, tallini niaqqunilu anniariuaannalersimavai. Taamaattumik nunagisaminit Islandimiut koruuniannik siusinaarluni soraarnerussutisiaqarpoq.

Kisianni Islandimiut koruuniata nalikillerujussuarnerata kinguneranik Gudrun Gisladottirip siusinaarluni soraarnerussutisiai danskit koruuninngortinneranni maanna affaannarmik amerlassuseqalerput, taamaattumillu siunissani ernumanartoqartippaa.

Tamatuma kinguneranik nakorsamut akissaaruppunga. Akiligassakka akilereeraangakkit 1.000 koruunit sinneruttarput.

Gudrun Gisladottir aperineqarami qaammammut pissarsiarisartakkami 5.000 koruuninik ikileriarneri qanoq iginerai, akivoq, nammineq allallu namminermisut inissisimasut aningaaseriviit aningaasarsiornikkut ajutoornissaraluinit annaassiniarnernut isiginnaartuullutik.

Aali aningaaseriviit taakkorpiaat ukiorpassuarni kikkunnut tamanut aningaasanik agguaasimasut, kingunissai eqqarsaatiginagit.

Tamanna akisussaassuseqanngitsumik ingerlatsineruvoq. Taamatullu ingerlatsisimanerat qissimigaanngivillugu aningaasarpassuit atorlugit annaanniarneqarput.

Aningaasarsiornerup ajutuunngikkallarnerani pissakillioreersut tassaapput maanna eqqugaasut, Gudrun Gisladottir oqarpoq.

Islandimiut 347-t Danmarkimi najugallit, Islandimit soraarnerussutisiartik kisiat inuussutissaraat. USA-mi aningaasarsiornikkut ajalusoorneq nunarsuaq tamakkerlugu nunarsuarmiut katillugit 7685 milliardit koruuninik annaasaqaatigisimassagaat naatsorsuutigineqarpoq. Nutaarsiassaqartitsivik Ritzau ualimut taama nalunaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq