Islandimiut arfanniartarnerat akerlilerniarlugu amerikamiut qanoq iliuuseqarnissamik sioorasaaripput
Uumasunik nujuartanik naasunillu nungutaanissamut qanittunik niueruteqartarnermik akerlersuilluni suliniuteqartup, Citesip peqqussutaat malillugit Islandimiut arfanniartarnerat unioqqutitsinerusoq, amerikamiut oqartussaasuisa tunngavilersuutigaat.
Islandimiut arfanniartarnerat pillugu Citesip tamanna præsident Obamamut suliakkiutigaat. Præsidentip taama suliakkerneqarnermi kingorna, Islandimiut aningaasatigut mattunneqarnissaat siunertaralugu, ullut 60-it ingerlaneranni aalajangernissaminik pisussaaffeqarpoq.
Suliaq aallartippoq 2011-mi. Præsident Obama taamani siullermik suliakkinneqarnini itigartitsissutigaa, siunersuutigalugut suliaq pisortatigoortumik torersumik aaqqinneqarnissasoq.
Arferit niuerutigineqarnerinut tunngatillugu, nunat tamalaat maleruaqqusaat 1986-imeersoq, Islandimiunit Norgemiunillu taamaallaat malinneqanngilaq.
Japanimiut ukiut tamaasa arferit hunnorujulikkaat pisarisarpaat, taakkuli inatsisip ilaa malillugu piniartarlutik oqaatigisarpaat, tassa inatsimmi allassimasoq 'arferit ilisimatusaatigineqarlutik pisarineqarsinnaasut' malillugit piniartarnerarlutik.
Islandimi arferit pisarineqartut amerlanerpaartaat Japanimut niuerutigineqartarput. Aamma Islandimiut ukioq mannamut arferit pisassatik 383-inut qaffappaat, naak siorna pisarisinnaasatik tamakkerlugit pisarinngikkaluarlugit ukioq manna qaffaallutik.
