Islandimiut arfanniaqqilerput
Islandimiut ukiuni 20-ni arfanniartanngeriarlutik arfanniartaqqilersut, qanoq arfanniartoqartarneranik puigorsimanngivipput.
Islandimiut sapaatip akunnerisa marluk matuma siornagulli arfanniaqqilersut, maannamut tikaagulliusaanik arfineq marlunnik pisaqareersimapput. Tikaagulliusaat neqaat 100 tonsit tuniniarneqarnissaminnut piareersut, arfanniartartut Hvalur-ikkut nalunaarutigaat.
Islandimiut arfanniaqqittalernerannut isummersuutit akerleriipput, ilaat akerliusut ilaat isumalluartut.
Islandimiut arfanniaqqittalernerannut tapersersuinertik Nunat avannarliit killiit siunnersuisoqatigiiffiata nalunaarutigaa.
Nunat tamalaat inatsisaat naapertorlugit, ilisimatusarnermilu inernerusut tunngavigalugit, Islandimiut nungusaataanngitsumik arfanniartarnissaminnut pisinnaatitaaffeqarnerat, Nunat avannarliit killiit siunnersuisoqatigiivisa islandimiut arfanniaqqittalernerannut tapersersuinerminnut tunngavilersuutigaat.
Tikaagulliit ukiumut 400-t, tikaagulliusaallu 200-t pisarineqartarpata, islandimiut arfanniarnerat nungusaataanavianngitsoq, Islandimi imaq pillugu ilisimatusarfimmeersut naliliipput.
Islandimiut qaammatini qulini tulliuttuni tikaagulliusaartassaat qulingiluaapput, tikaagullittassaallu 30-ullutik. Ilisimatusaatigalugu tikaagullittassiissutit 39-iupput.
Atlantikup avaannaani 23.800-nik tikaagulliusaaqartoq, 70.000-inillu tikaagulleqartoq, Nunat Avannarliit killiit siunnersuisoqatigiivisa nalunaarutigaat.
