Islandimiut allagaatitoqarsui ulorianartorsiortinneqalertut
Allagaatitoqqat taaneqartarput "Nunarsuup eqqaamasaasa ilaat pingaaruteqartut" UNESCO-llu kulturikkut kigorngussat allattorsimaffianiillutik. Allagaatitoqarsuit immikkut toqqorfissiami Københavnip Universitetiata Amagererimi immikkoortortaaniitinneqarput ikuallattoqalissappat kælderimut ingerlaannaq appartussatut.
Sipaarnissamut piumasaqaateqarnerata universiteti nuuttariaqalersissinnaavaa, taamaattumik toqqorsiviup siunissaa ilisimaneqanngitsoq Kristeligt Dagblad taama allappoq.
Katersat taaneqartarput Den Arnamagnæanske Samling, tassaniippullu uppernarsaatit 3000-it. Islandimiup professorip Arni Magnussonip 1663-imiit 1730-mut inuusup katersarai Københavnillu Universitetianut kigorngussassanngortissimallugit.
Katersat ilaat 2009-mi Islandip Universitetianut Reykjavikimiittumut tunniunneqarput.
Illorsuup tamakkunannga toqqorsivittallip matuneqarnissaanik siunnersuut immikkoortortami Det Humanistiske Fakultetip Københavnip Universitetianiittup suli suliarinngilaa.
Immikkoortortaq taanna siorna 80 millioner koruuninik sipaaqqusaasoq, maanna aamma 75 millioner koruuninik sipaaqqusaammat illorsuup allagaatitoqqanik toqqortaasivillip matuneqarnissaa siunnersuutigineqarsimavoq.
Islandip Danmarkimi aallartitaa Benedikt Jónsson pilersaarummut assut akerliusoq Kristeligt Dagblademut qarasaasiakkut ima allappoq:
- Suliaq assut ilungersunartutut isigaara, Danmarkimi Islandimilu oqartussat qutsernersaanni oqallisigineqartariaqarpoq. Assammik allagaassuit Islandip kulturikkut kigorngussaasa annersaraat pingaarnersaralugillu. Taamaattumik uagutsinnut assorsuaq pingaaruteqartut, islandimiut Danmarkimi aallartitaat taama allappoq.
