Islandimiut ajuallaqqapput

- Ukiuni pingasuni Amerikamiut uukapaasiarisimavaatigut, taama Amerikamiut Islandimi Keflavikimi sakkutooqarfimminik matusisussanngornerannut, Islandip nunaateqarnermut ministeria Fremskridtspartiimeersoq, Gudni Agustsson, Islandip TV-qarfiani apersorneqarluni sakkortuumik isornartorsiuteqarpoq.

Amerikamiut Islandimi 1951-imi sakkutooqarfeqalerput, taannalu pillugu nunat taakku marluk ukiuni pingasunngortuni isumaqatigiinniarsimapput, USA-p sakkutooqarfimmik matusinissaminik aalajangerneranik naggaserneqartumik. Amerikamiut Islandimi sakkutooqarfiat matuppat Island NATO-mit illersugaalissaaq.

- Ukiuni pingasuni asulersuaq isumaqatigiinniarsimavugut, pisullu takutippaa George Bush USA-mi præsidentiulermalli USA-p Islandimut attaveqarnera ajortikkiartuinnarsimasoq, Gudni Agustsson oqarpoq.

Islandimi naalakkersuisut siulittaasuat Halldór Ásgrímsson USA-p præsidentianut George Bushimut Keflavikip qanoq pineqarnissaa pillugu apeqquteqarluni aallagaqarsimavoq.