Islandimiut ajornaveqaat

Volleyballimi nunanut allanut unammisartut marluiusut Islandimut unamminerminni pingasunngornermi unnukkut ajorsarput. Angusat takukkit.
Allattoq Noah Mølgaard
juunip 23-at 2011 04:44

Nunanut allanut unammisartut arnat angutillu Islandimut pisortatigoortumik unamminerminni tamarmik 3-0-mik ajorsarput arnartaat sætini 17-25, 10-25 aamma 15-25-mik ajorsarput. Taassuma kinguninngua angutit ajorsarput 25-20, 25-20 aamma 25-12-mik.

Taamaakkaluartoq kalaallit sungiusaasuata angusaq iluaqutaassangatippaa.

- Ilimagilluinnarpara Island Gamesimi unammisassatsinnit Islandimiut kakkannerusut. Taamaattoq arsarnerat uagut sunniuteqarfigaarput Island Gameseqarnissaani iluaqutigisinnaasatsinnik, nuna tamakkerlugu sungiusaasoq Claus Skov Møller KNRimut oqarpoq.

- Arsarnerat ilaatigut sunnerparput arsamik aallartitsisarnermi qeqqani arsartuat sunnerlugu. Aamma sinaani arsartui Island Gamesimi unammisassatsinnit kakkannerusut assertarpagut, Claus Skov Møller oqarpoq.

Taamaattoq Island Gamesimut ilimasuutini taasaqarsinnaannginnerarpoq unammisassamik kakkassusaat suli nalugamiuk. Claus Skov Møller arnanut angutinullu nuna tamakkerlugu sungiusaasunngorpoq upernaaq.

Island Gamesimi volleyballimi unammersuarnerit aallartissapput sapaat juunip 26-iat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq