Islandimiup aqqulluttukkoorluni aqqunartiternini toqqutigaa

Ilulissani erngup nukissiorfiliornermi marlunngormat ajutoorneq toqumik kinguneqartoq qanoq pisimanersoq Nukissiorfiup maanna ilisimatitsissutigaa.
Allattoq Najaaraq Egede
septembarip 23-at 2010 12:37

Ajutoornermi angut ingeniøreq inuusuttoq Islandimeersuusoq ajunaarpoq. Tamanna pivoq Ilulissani Paakitsumi erngup nukinganik innaallagissiorfiliornermut atatillugu marlunngornermi septembarip ulluisa 21-anni ajutoortoqarnerani.

Ajutoorneq tatsinut erngup nukinganik innaallagissiorfimmut imilersuiffiusussanut aqqusinissamik nalunaarsuinermut atatillugu pivoq. Ajutoortoq sikkilinik motoorilinnik sisamanik assakaasulinnik aqqulluttukkoortilluni uppissimavoq, qamutillu assakarneranni nanertilluni. Timmisartuaqqamik aggersitsisoqaraluarpoq, apuutinngitsiartorli angutip inuusuttup aqqunartiternini toqqutigai.

Sulisitsisoq Islandimi entreprenørfirma Ístak timmisartumik attartorluni toqusup ataataanik Ilulissiaassisitsivoq, toqusullu timaa aqagu tallimanngornermi Islandiliaanneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq