Islandimiuaqqat pikkorissut

Nunat suliffissuaqarfiusut aningaasarsiornermi suleqatigiinnikkut ineriartortitsinikkullu suleqatigiiffiata OECD-p, atuartunik 15-nik ukiulinnik matematikimik pinngortitalerinermillu piginnaasaannik misissuisitsinerani paasisat Islandimi oqallisaangaatsiarput.

Missuinerup takutippaa Islandimi atuartut piginnaasat nunani allani atuartunut naleqqiullutik naammaginarnerit akornanniittut, siusinnerusukkullu misissuinerni taamaattuni paasisanut assingusut.

Tupaallaatigineqartumillu Islandimi niviarsiaqqat kisitsinermi pinngortitalerinermilu pikkorinnerit arfineq pingajoraat, nukappiaqqat normu 20-jusut.

Nunani OECD-miittuni amerlanerni nukappiaqqat piginnaaneqarnerusutut inissisimajuartarput. Finlandimi atuartut 15-nik ukiullit misissuiffigineqartuni piginaaneqarnerpaatut inissisimapput, misissuinerulli inernerata takutippaa kingullermik misissuinermiit atuartut piginnaaneqarnerpaat piginnaanikinnerpaallu nikingassusiat annertusisimasoq.

Misissuineq naapertorlugu danskit atuartuisa Islandimiullu piginnaasaat imminnut assingupput.

Kalallit Nunaat misissuinermi ilaanngilaq.

Misissuinerup ilaatigut takutippaa atuartitsineq angusaqarnarnerpaaffiusartoq, atuartut atuarfiullu akornanni silaannaq isumalluarnartuuppat, ilinniartitsisut atuartullu akornanni attaveqatigiiffiulluartoqarpat kiisalu atuartut matematik-imik ilikkarusussuseqarlutillu imminnut piumaffigisuusarpata minnerunngitsumillu atuartitsineq pitsaasumik piumaffiginniffiuppat.

Nunani pitsaasumik inissisimasuni maluginiagassaavoq atuarfiup pisortallu akornanni akisussaassuseqartumik aqutsisoqartoq, atuartitsinerup imarisaanut pigisanillu atorluaaneq eqqarsaatigalugit.