Islandimiu Grand Prix-imi ajugaaniutivinneqataasussanngorpoq
Islandimi aningaasarliornerup nalaani tulluussimaarutissaqarlualerput, erinarsortartormi Islandimeersoq, Yohanna, erinarsorluni Melodi Grand Prix-imi ajugaaniutivinnissamut Moskvami arfininngorpat pisussamut, anngukkami.
Allattoq Jaaku Lyberth
maajip 14-at 2009 08:17
- Nutaarsiassanik nuannersunik nunarput maanna pisariaqartitsivoq. Nunarput aningaasarliornermiit aniguisinniarlugu erinarsorniarpunga, nuannaaqaangalu, Moskvami marlunngormat semifinalertoqareersorlu tusagassiortunik katersortitsinermi Yohanna oqarpoq.
Semifinalit aappaat unnugu pissaaq, finalimullu anngunniartussanut Danmark ilaavoq.
Semifinalili taanna KNR-ikkut unnugu aallakaatinneqassanngilaq, Inatsisartunut qineqqusaarneq Ilulissanit unnugu nalunaaqutaq arfineq-pingasuniit unnuap-qeqqata tungaanut toqqaannartumik KNR-ikkut aallakaatitsisoqassammat.
Yohannap Danmarkillu Melodi Grand Prix-mi semifinalimi peqataanerat KNR-ikkut aqagu unnukkut aallakaatinneqarumaarpoq.
