Islandimit kujataanut timmisartuussisarnissat saqqummiunneqarput
Danmarkip, Kalaallit Nunaata Islandillu akornanni nutaamik timmisartuussisalernissaq pillugu Air Greenlandip Air Icelandillu saqqummiussaat, nunatsinni Islandimilu naalakkersuisut isummerfigisussanngorpaat.
Timmisartuutileqatigiiffiit Air Greenland Air Icelandilu peqatigiillutik, Reykjavikkip, Narsarsuup Danmarkillu akornanni ukiuni tulliuttuni tallimani angallassisinnaanissartik kissaatigaat.
Islandip kujataatalu akornanni timmisartuussinermik isumaqatigissut, qaammat ataaseq qaangiuppat atorunnaartussaq taamaalillugu annertusillugu pilersinniarpaat.
- Takornariat amerlanerit kujataanut tikinnissaat angallaviup nutaap periarfississavaa, Air Greenlandip pisortaa, Flemming Knudsen oqarpoq:
- Timmisartuussisarnissamut saqqumiussarput tassaavoq, ingerlavik pingasoqiusanngorlugu pilersaarut. Tassalu Europami angalatitseqatigiiffiit Islandimut, Islandimiillu kujataanut takornarianut neqerooruteqarnissaannut ammaassinissaq. Angorusupparput, kujataani takornariartitsinermik suliallit kiisalu Danmarkimi Europamilu takornariartitsinermik suliallit taama neqerooruteqarsinnaalernissaat, Air Grenlandip pisortaa, Flemming Knudsen oqarpoq.
Timmisartuutileqatigiiffiit kissaatigaat massakkut angallassisarnertik attatiinnassallugu, tassalu aasaanerani sapaatip akunnerini qulini, sapaatip akunneranut marloriarluni timmisartuussisarnissaq. Angallavissat pingasoqiusanngorneratigut neriuutigaat takornariat amerlanerit Islandimut Kalaallillu Nunaanullu ingerlasalissasut.
Massakkutut timmisartuussisarneq ukiuni pingasuni ingerlasimasoq, ukiumut 2000-inik angallassiffiusarpoq. Taakkulu 3000-nut amerlinissaat kissaatigigitsik Flemming Knudsenip oqaatigaa.
Timmisartuutileqatigiit aamma neriuutigaat Islandimi angallassiviup imminut napatissinnaalernissaanut, Islandimi nunatsinnilu naalakkersuisut ingerlatsinermut tapiissuteqassasut.
Pisortatigut tapiiffigineqarani ingerlatsinissaq, Flemming Knudsenip pissusissamisoornerutikkaluarlugu inuiaqatigiinnut niuerluarnerussasoq oqaatigaa:
- Kujataani takornariat amerlanerulernissaat ujartorneqartuarpoq. Aaqqissuussinerullu matuma kingunerissavaa, kujataani innuttaasunut suliffissaqarnerulersitsineq, Air Greenlandip pisortaa Flemming Knudsen oqarpoq.
Air Greenlandip pisortaata aamma oqaatigaa, pilersaarutitut saqqummiussatik qaqugu imminut akilersinnaasumik ingerlalersinnaanersut oqaatigisinnaanagu.
